Ապարանում պտտահողմի հետևանքով տուժածների թվում կա երեխա

Ապարանի բժշկական կենտրոնի տնօրեն Հայկ Շմավոնյանը տեղեկացրել է, որ քաղաքում պտտահողմի հետևանքով վնասվածք ստացած անձանցից 3-ը չափահաս են, 1-ը երեխա է։ Բոլորն ստացել են համապատասխան բժշկական օգնություն, վնասվածքները վերին վերջույթների շրջանում են՝ միջին և թեթև ծանրության, բարեբախտաբար, կյանքին սպառնացող վտանգներ չկան:

Ավելի վաղ մարզպետարանից հայտնել են, որ Ապարանը հոսանքազրկված է, անվտանգության նկատառումով դադարեցվել է նաև գազամատակարարումը։

Ժամը 19։00-ի դրությամբ վնասվել են 21 շենք-շինությունների տանիք, 19 մարդատար, 3 բեռնատար ավտոմեքենա, տապալվել է 15 ծառ և 8 էլեկտրական սյուն։