Դպրոցում դանակահարված դեռահասը վիրահատվել է

Երեկ՝ հունիսի 11-ին, Երևանի Աջափնյակ վարչական շրջանի դպրոցներից մեկում տեղի ունեցած միջադեպի ժամանակ դանակահարված 15-ամյա պատանին վիրահատվել է։ Այս մասին լրատվականներին տեղեկացրել է «Սուրբ Աստվածամայր» ԲԿ-ի բժիշկ Արթուր Հարությունյանը։
Նրա խոսքով՝ պատանին բուժհաստատություն է տեղափոխվել շտապօգնության բրիգադի ուղեկցությամբ՝ ձախ վերին վերջույթի և առաջնային որովայնի պատի կտրած-ծակած վերքերով։ «Առաջին հերթին կանգնեցվել է արյունահոսությունը, կատարվել են անհրաժեշտ հետազոտություններ, որից հետո երեխան տեղափոխվել է վիրահատարան։ Վիրահատությունը տևել է մոտ 3.5 ժամ, որի արդյունքում հաջողվել է վերականգնել վնասված հյուսվածքները»,- նշել է բժիշկը։
Ներկայումս երեխան գտնվում է բաժանմունքում, վիճակը գնահատվում է բավարար, 3-4 օր անց նա դուրս կգրվի։ Առաջիկա մեկ ամսվա ընթացքում դաստակը կմնա անշարժացված, ինչից հետո կանցկացվի վերականգնողական բուժում, և կանխատեսվում է, որ ձեռքի ֆունկցիաները կվերականգնվեն։

Ավելի վաղ լրատվամիջոցները հաղորդել էին, որ դեպքը տեղի է ունեցել հունիսի 11-ին, ժամը 11:30-ի սահմաններում, Երևանի Աջափնյակ վարչական շրջանում գտնվող դպրոցներից մեկի տարածքում։ Վիճաբանության ժամանակ 14-ամյա աշակերտը դանակով հարվածներ է հասցրել իր հասակակիցին՝ պատճառելով տարբեր մարմնական վնասվածքներ։