«Լոս Անջելեսը կազատագրվի միգրանտների ներխուժումից»․ Թրամփ

ԱՄՆ նախագահ Դոնալդ Թրամփը Truth Social սոցիալական ցանցում մեկնաբանել է Լոս Անջելեսում ներգաղթի խստացման դեմ ցույցերի ժամանակ տեղի ունեցող անկարգությունները: Նրա խոսքով՝ «երբեմնի ամերիկյան մեծ քաղաքը» գրավվել է ապօրինի ներգաղթյալների կողմից։

«Մինչ դաժան, ըմբոստ ամբոխը հարձակվում է մեր դաշնային գործակալների վրա՝ փորձելով դադարեցնել արտաքսման գործողությունները, այս անօրինական անկարգությունները միայն ամրապնդում են մեր վճռականությունը»,- գրել է ԱՄՆ նախագահը։

Թրամփը հայտնել է, որ հանձնարարել է անվտանգության և պաշտպանության նախարարներին, ինչպես նաև գլխավոր դատախազ Փեմ Բոնդիին՝ «ձեռնարկել անհրաժեշտ միջոցներ՝ Լոս Անջելեսը ներգաղթյալների ներխուժումից ազատելու և անկարգություններին վերջ տալու համար»։

«Կարգը կվերականգնվի, անօրինական ներգաղթյալները կարտաքսվեն, և Լոս Անջելեսը կազատագրվի»,- հավելել է Թրամփը։

Նախօրեին ներգաղթյալների զանգավածային ձերբակալությունների դեմ Լոս Անջելեսում բողոքի ցույցեր են ընթացել, որի ժամանակ ոստիկանության և ցուցարարների միջև բախումներ են տեղի ունեցել։ Կան բազմաթիվ բերման ենթարկվածներ։