Մերցը Թրամփին հիշեցրել է նրա գերմանական արմատների մասին

ԱՄՆ-ում պաշտոնական այցով գտնվող Գերմանիայի կանցլեր Ֆրիդրիխ Մերցը Օվալաձև աշխատասենյակում ԱՄՆ նախագահ Դոնալդ Թրամփի հետ հանդիպման ժամանակ նրան է հանձնել նախագահի պապի ծննդյան վկայականի պատճենը: Արարողությունը հեռարձակվել է NTV-ով։

Մերցն ինքը սոցցանցում բացատրել է, որ շրջանակի մեջ տեղադրված անգլերեն թարգմանությամբ փաստաթուղթը տրամադրվել է Գերմանիայի արտաքին գործերի նախարարության կողմից։

Թրամփի տատն ու պապը ԱՄՆ են գաղթել Գերմանիայի արևմուտքում գտնվող Կալշտադտ համայնքից (Ռեյնլանդ-Պֆալց):

Ըստ լրատվամիջոցների ԱՄՆ նախագահի պապը՝ Ֆրեդերիկ Թրամփը (Ֆրիդրիխ Թրամփ), ծնվել է Կալշտադտում՝ 1869 թվականին և գաղթել է ԱՄՆ 1885 թվականին, ապա՝ Սիեթլ, որտեղ զբաղվել է անշարժ գույքի գործունեությամբ, վարձակալել և ղեկավարել ռեստորան, բար և նույնիսկ հասարակաց տուն։ 1901 թվականին նա վերադարձել է Գերմանիա, որտեղ ամուսնացել է Էլիզաբեթ Քրիստի հետ, որից հետո զույգը տեղափոխվել է Նյու Յորք։

Մերցը Սպիտակ տան Օվալաձև աշխատասենյակում Թրամփին առաջարկել է ընդլայնել Գերմանիայի և ԱՄՆ-ի միջև համագործակցությունը:

«Մենք մեր պատմության մեջ շատ ընդհանուր բաներ ունենք: Մենք շատ բանով պարտական ​​ենք ամերիկացիներին: Մենք երբեք չենք մոռանա դա», - ասել է կանցլերը՝ ԱՄՆ նախագահի գերմանական արմատներն անվանելով «սերտ համագործակցության շատ լավ հիմք»: