Բեռլինում Մերցը հյուրընկալել է Զելենսկուն

Ուկրաինայի նախագահ Վլադիմիր Զելենսկին ժամանել է Գերմանիա՝ կանցլեր Ֆրիդրիխ Մերցի հրավերով, հայտնում են գերմանական լրատվամիջոցները:

Առանձնազրույցից հետո երկու երկրների առաջնորդները համատեղ ասուլիս են անցկացրել, որի ընթացքում քննարկվել են երկկողմ համագործակցության, Ռուսաստանի հետ պատերազմում Ուկրաինային հետագա աջակցության և եվրոպական անվտանգության ապագայի հիմնական հարցերը: Զելենսկին շնորհակալություն է հայտնել Գերմանիային՝ ռազմական և ֆինանսական օգնության համար:

Մերցը, իր հերթին, ընդգծել է Ուկրաինայի հետ անսասան համերաշխությունը։ «Այցի ուշադրության կենտրոնում կլինեն Գերմանիայի աջակցությունը Ուկրաինային, ինչպես նաև հրադադարի հասնելու ջանքերը»,- ավելի վաղ հայտնել էր Գերմանիայի կառավարության խոսնակը։

Հիշեցնենք՝ Մերցը երկուշաբթի հայտարարել էր, որ Գերմանիան և այլ հիմնական դաշնակիցներ վերացրել են Ուկրաինային մատակարարվող զենքի հեռահարության սահմանափակումները։