«Թուրքիան մտադիր է ռազմաբազաներ ստեղծել Սիրիայում»․ #Türkiye

Թուրքիան նախատեսում է ռազմական բազաներ ստեղծել հարևան Սիրիայում՝ «Իսլամական պետություն» ահաբեկչական խմբավորմանը հակազդելու համար։ Այս մասին հաղորդում է «Türkiye» թերթը՝ հղում կատարելով անվտանգության ուժերի աղբյուրներին։

Լրատվամիջոցի պարզաբանմամբ՝ խոսքը ցամաքային զորքերի և ռազմաօդային ուժերի համատեղ բազայի, ինչպես նաև ռազմածովային բազայի մասին է։ Նոր պայմաններում Թուրքիան կտրամադրի անհրաժեշտ օգնություն Սիրիայում անվտանգությունն ու կայունությունն ապահովելու համար, գրում է թերթը՝ հավելելով, որ ԱՄՆ-ն իր զորքերի մեծ մասը դուրս կբերի Սիրիայից՝ արաբական հանրապետությունում թողնելով «խորհրդանշական բնույթի բազա»։

Ավելի վաղ Էրդողանը Ստամբուլում ընդունել էր Սիրիայի ժամանակավոր առաջնորդ Ահմեդ ալ-Շարաային։ Նա նշել է հարևան երկրի տարածքային ամբողջականության պահպանման կարևորությունը և հայտարարել Դամասկոսի հետ համապարփակ կապեր զարգացնելու Անկարայի մտադրության մասին՝ այդ թվում ռազմական ոլորտում։