«Հայտարարագիրը դարձնելու են քաղաքական ահաբեկման գործիք»․ Նաիրի Սարգսյան

«Ֆիզիկական անձինք շատ դժվարությամբ կարող են ինքնուրույն լրացնել հայտարարագրերը և բնականաբար նրանք ծառայություն մատուցող ընկերությունների օգնությանն են դիմելու»,- ասուլիսի ժամանակ ասաց տնտեսագետ Նաիրի Սարգսյանը։ «Տարբերություն չկա՝ անձի բանկային գաղտնիքին տիրապետեց հարկային ծառայության աշխատակիցը, թե՞ հաշվապահական կամ խորհրդատվական ընկերության ինչ-որ աշխատակից։ Չեք կարող իմանալ, թե այդ բանկային գաղտնիքը որտեղ կարող է օգտագործվել։ Հետևաբար կոչ եմ անում բանկային գաղտնիքը որևէ մեկին չտրամադրել»,- ասաց տնտեսագետը՝ նշելով, որ բոլորին անխտիր հարկելու պատճառը պետական բյուջեի եկամուտների թերակատարումն է։ «Այս հայտարարագիրը դարձնելու են քաղաքական ահաբեկման գործիք։ Տիրապետելով մարդկանց բանկային գաղտնիքին՝ շանտաժի են ենթարկելու և իրենց կամքն են թելադրելու»,- ասաց Սարգսյանը՝ նշելով, որ պատրաստ է բանավիճել Փաշինյանի և ոլորտի պատասխանատուների հետ։