Grand Kartal հյուրանոցի սեփականատերը ողբերգական հրդեհի համար մեղադրում է անձնակազմին

Grand Kartal հյուրանոցի սեփականատերը, որտեղ հունվարի 21-ի գիշերը հրդեհի հետևանքով զոհվել է 78 մարդ, միջադեպի համար մեղադրել է անձնակազմին՝ խոհարարին, էլեկտրիկներին և անվտանգության աշխատակիցներին, հայտնում է T24-ը։

Աղբյուրի փոխանցմամբ՝ խնդիրներ են առաջացել հյուրանոցի հակահրդեհային ազդանշանային և ծխի վերահսկման համակարգերի, ինչպես նաև վթարային ելքերի հետ կապված։ Նախնական տեղեկություններով՝ հրդեհը բռնկվել է ռեստորանի խոհանոցում։ Մահվան դեպքերի մեծ մասը տեղի է ունեցել շմոլ գազի թունավորման հետևանքով։

Հետաքննության շրջանակներում ձերբակալվել է 15 մարդ, այդ թվում՝ խոհարար Ֆայսալ Յավերը, էլեկտրիկ Հուսեյն Օզերը և Grand Kartal հյուրանոցի սեփականատեր Հալիթ Էրգյուլը (լուսանկարում-խմբ.)։ Վերջինս ասել է, որ խոհարարը պատասխանատու է խոհանոցի էլեկտրական սարքերի համար, իսկ հյուրանոցի էլեկտրիկը պարտավոր էր ստուգել հրդեհային ազդանշանային կոճակները:

Հյուրանոցի էլեկտրիկ Հուսեյն Օզերը հերքել է Էրգուլի մեղադրանքները և ասել, որ ինքը միայն կատարում է իրեն հանձնարարված պարտականությունները, և որ հրդեհային ազդանշանային և պաշտպանության համակարգերը կառավարվում են արտաքին կապալառուի կողմից: Օզերն ասել է, որ ինքը տեխնիկական տեղեկատվություն չունի այդ համակարգերի մասին, և որ համապատասխան մանրամասները հայտնի են հյուրանոցի ղեկավարությանը կամ տեխնիկական մենեջերին:

Էրգյուլի խոսքով, մշակույթի և զբոսաշրջության նախարարությունը հյուրանոցում կանոնավոր հրդեհային անվտանգության ստուգումներ է անցկացնում, վերջինը եղել է դեկտեմբերին, իսկ հյուրանոցում տարին երկու անգամ անցկացվում են հրդեհային վարժանքներ։