«Ո՞րն է «ազգային» անվանումը «պետական»-ով փոխարինելու նպատակը»․ Հասմիկ Պապյան

Ինչպես հայտնի է երեկ Ազգային ժողովը ընդունեց «Մշակութային օրենսդրության հիմունքների մասին ՀՀ օրենքում լրացումներ և փոփոխություններ կատարելու մասին» օրինագիծը, ըստ որի՝ Հայաստանի Օպերայի և բալետի թատրոնի, պատկերասրահի, գրադարանի և այլ մշակութային կառույցների անվանումներից կհանվի «ազգային» բառը։
«Մեդիահաբ»-ի հետ զրույցում հարցին անդրադարձել է օպերային երգչուհի, սոպրանո, ՀՀ ժողովրդական արտիստ Հասմիկ Պապյանը․ «Ինձ համար անհասկանալի է, թե ինչո՞ւ հիմա, այս պահին կայացվեց նման որոշում, առանց լուրջ քննարկումների, առանց քաղաքացիների կարծիքը հաշվի առնելու։ Չէ՞ որ աշխարհի շատ երկրներում, թատրոնները, գրադարանները ազգային են՝ Փարիզի ազգային օպերային թատրոն, Պրահայի, Բուխարեստի, Սոֆիայի և այլ երկրների ազգային օպերային թատրոններ, Ավստրիայի ազգային գրադարան Վիեննայում և շատ այլ օրինակներ»,- ասել է Պապյանը՝ զարմանք հայտնելով, թե ի՞նչ ասել է՝ «ազգային» անվանումը փոխարինել «պետական»-ով, ի վերջո ո՞րն է սրա նպատակը։
«Ես հավատում եմ իմ ժողովրդի ողջախոհությանը ու չեմ կարծում, որ սա լուրջ հետևանքներ կունենա։ Պարզապես որպես քաղաքացի, մշակույթի մարդ, արտահայտել եմ իմ կարծիքը… Օպերային թատրոնի, պատկերասրահի, գրադարանի անվանումներից ազգային բառը հեռացնելով՝ չեք հաջողելու բովանդակային ոչինչ փոխել, այն առավել ազգային է դառնալու»,- ընդգծեց ժողովրդական արտիստը։