Տրդատ Առաջին թագավորի արձանը` Լուվրում

Քչերը գիտեն, որ Լուվրում է գտնվում Մեծ Հայքի թագավոր Տրդատ Ա-ի մարմարակերտ արձանը: Արձանը հավանաբար քանդակվել է Հռոմում 66թ-ին, երբ Տրդատը մեծ շուքով ընդունելության է արժանացել Ներոն կայսեր կողմից:
Պատմությունից հայտնի է, որ Հռանդեայում հաշտության պայմանագիր կնքելուց հետո 3500 հոգանոց շքախմբով Տրդատը մեկնել է Հռոմ, որտեղ նրան ընդունել են արքայավայել։ Ներոնը, բացի թագից, նաև արհեստավորներ է տրամադրել Տրդատին հռոմեացիների կողմից ավերված Արտաշատի վերականգնման համար։ 66 թվականին Տրդատ Ա-ն վերադարձել է Մեծ Հայք։ Նրա օրոք է կառուցվել նաև Գառնիի հեթանոսական տաճարը:
Տրդատ Առաջինը հայտնի է իր դիվանագիտական հմտություններով, որոնք հատկապես դրսևորվել են Հռոմի կայսր Ներոնի հետ բանակցությունների արդյունքում, ինչի շնորհիվ Հայաստանը և Հռոմեական կայսրությունը դարձան դաշնակից և բարեկամ պետություններ և Հայաստանը կարողացավ շուրջ 50 տարի խաղաղության պայմաններում բարգավաճել: