Բաշար Ասադը պատմել է` ինչպես է հեռացել երկրից

Բաշար ալ-Ասադի տարհանումը Սիրիայից նախապես ծրագրված չի եղել: Այն իրականացվել է այն բանից հետո, երբ իրեն ենթակա բոլոր ուժերը դուրս են եկել մարտական ​​գծերից, այս մասին հայտնել է Ասադի գրասենյակը՝ նրա անունից հայտարարություն տարածելով սոցցանցերում։
Նշվում է, որ Ասադը երկիրը լքելու մտադրություն չի ունեցել։ «Վերջին իրադարձությունների ընթացքում ես երբեք չեմ դիտարկել հրաժարական տալու կամ մեկ այլ երկրում ապաստան խնդրելու հնարավորությունը»,- ասել է Սիրիայի այժմ նախկին նախագահը։ Նրա խոսքով՝ ինքը Դամասկոսում մնացել է մինչև վերջին պահը։ «Ես ծրագրված չեմ լքել իմ հայրենիքը, ինչպես փորձում են ներկայացնել, և չեմ լքել այն մինչև մարտերի վերջին ժամերը։ Ես Դամասկոսում մնացի՝ կատարելով իմ պարտականությունները մինչև դեկտեմբերի 8-ի առավոտ»,- ասված է հայտարարության մեջ։

Այնուհետև Ասադը տեղափոխվել է Լաթաքիա՝ «Խմեյմիմ» ավիաբազա, որտեղից հետագայում տարհանվել է Ռուսաստան։ Արդեն բազայում նա իմացել է, որ սիրիական զինված ընդդիմությունը մտել է մայրաքաղաք։

Ինչպես ավելի վաղ հայտնել էր ՌԴ ԱԳՆ-ն, Ասադի տարհանումը տեղի է ունեցել հակամարտության մի շարք մասնակիցների հետ նրա բանակցություններից հետո, որոնց ընթացքում նախկին նախագահը որոշել է հեռանալ իր պաշտոնից և հանձնարարել է խաղաղ ճանապարհով փոխանցել իշխանությունը։