Զելենսկին ցանկանում է պատերազմն ավարտել 2025 թվականին` «դիվանագիտության» միջոցով 

Չնայած ճակատում տիրող ծանր իրավիճակին, Ուկրաինան մտադիր է ջանքեր գործադրել պատերազմն ավարտելու համար ոչ ուշ, քան 2025թ-ին:

«Մեր կողմից մենք պետք է ամեն ինչ անենք, որպեսզի պատերազմն ավարտվի հաջորդ տարի, դա շատ կարևոր է», - ասել է նախագահ Վլադիմիր Զելենսկին ուկրաինական ռադիոյի 100-ամյակի կապակցությամբ տված հարցազրույցում, որը հրապարակվել է շաբաթ օրը՝ նոյեմբերի 16-ին։

Ուկրաինայի ղեկավարը խոստովանել է, որ իրադրությունը ռազմաճակատի արևելյան հատվածում «իրոք ծանր է»։ Ռուսական զորքերը, թեև դանդաղ, բայց առաջ են գնում։ Զելենսկին ռազմաճակատում ռուսների հաջողությունները բացատրել է պատրաստված անձնակազմ և սպառազինություն ունեցող բրիգադների դանդաղ հավաքագրմամբ։ Նրա խոսքով՝ Ուկրաինան դեռ չի ստացել ԱՄՆ-ի խոստացած սպառազինության կեսը։

Միաժամանակ, Զելենսկին ակնկալում է, որ ռուսական զորքերի առաջխաղացումը կդանդաղի՝ հաշվի առնելով մարտի դաշտում նրանց մեծ կորուստները։ «Օրական ունենում են 1,5-2 հազար զոհ, վիրավորներ ու սպանվածներ, չեն կարողանում անընդհատ առաջ շարժվել, իսկ որոշ ուղղություններով արդեն պարզ է, թե ինչպես է դանդաղել նրանց առաջխաղացումը:

Հիմա նրանց կանգնեցնելու համար պետք կգան ռեզերվներ, ամբողջական բրիգադներ, ինչին այդքան սպասել ենք»,- ասել է նա։