Աբխազիայում ցուցարարները կոտրել են խորհրդարանի ու նախագահականի դարպասները

Աբխազիայի մայրաքաղաք Սուխումիում քաղաքացիները բողոքի ցույց են անցկացրել խորհրդարանի և նախագահականի մոտ՝ ընդդեմ Ռուսաստանի հետ ներդրումային համաձայնագրի կնքման։

Նրանք բեռնատարով կոտրել են խորհրդարանի շենքի դարպասներն ու ներխուժել, ապա շրջափակել են նախագահականը և կրկին կոտրել դարպասները:

Նրանք պահանջում են նախագահի անհապաղ հրաժարականը:

Ցուցարարները ձվեր ու շշեր են նետել ոստիկանների ուղղությամբ, որոնք հատուկ միջոցներ են կիրառել։ Հնչել են նաև կրակոցներ։ ՏԱՍՍ-ի փոխանցմամբ՝ բողոքի ակցիայի ժամանակ տուժել է ութ մարդ:

Ինչպես նշում է «ՌԻԱ Նովոստի»-ն, հոկտեմբերի 30-ին Ռուսաստանը և Աբխազիան համաձայնագիր են ստորագրել, որը թույլ է տալիս ռուսական ընկերություններին ներդրումային գործունեություն ծավալել հանրապետությունում։ Համաձայնագրի վավերացումը նախատեսված էր նոյեմբերի 15-ին։ Աբխազական ընդդիմությունը կարծում է, որ այս համաձայնագիրը կհանգեցնի «օլիգարխիայի ընդլայնմանը» և Աբխազիայի կողմից տնտեսական ինքնիշխանության կորստի։ Նոյեմբերի 11-ի երեկոյան անվտանգության ուժերը ձերբակալել են համաձայնագրի հակառակորդներին։ Դրանից հետո բողոքի ալիքը տարածվել է ամբողջ Աբխազիայում։