Թբիլիսիում ընդդիմությունը ներկայացրել է կարճաժամկետ պլան և երկարաժամկետ ռազմավարություն

Վրացական ընդդիմադիր կուսակցությունների առաջնորդներն իրենց համակիրների հետ միասին խոստանում են համակարգված բողոքի ցույցեր սկսել նոր խորհրդարանական ընտրությունների անցկացման պահանջով, քանի որ չեն ճանաչում նախորդի արդյունքները, որոնց համաձայն հաղթել է իշխող «Վրացական երազանք» կուսակցությունը։
Ընդդիմադիր «Միասնություն-Ազգային շարժում» կուսակցության առաջնորդ Գիորգի Վաշաձեն Թբիլիսիի Ռուսթավելի պողոտայում բողոքի ցույցի ժամանակ ասել է, որ «երեքշաբթի օրվանից կսկսվեն երթեր և բողոքի ակցիաներ՝ նախ Թբիլիսիում, այնուհետև ամբողջ Վրաստանում»։ Նրա խոսքով, ընդդիմության հիմնական պահանջը նոր խորհրդարանական ընտրություններ նշանակելն է, քանի որ «քվեարկության ընթացքում խախտվել է գաղտնիությունը»։ «Մենք պահանջում ենք նոր ընտրություններ, որովհետև չենք ճանաչում գողացված ընտրությունները և չենք ճանաչում խորհրդարանի լեգիտիմությունը... Մենք առճակատման ճակատ ենք բացում... Յուրաքանչյուր հաջորդ բողոքը կլինի ավելի սուր և նպատակաուղղված»,- ասել է Վաշաձեն՝ հավելելով, որ դրան զուգահեռ ընդդիմությունը շարունակում է ենթադրյալ ընտրակեղծիքների ապացույցներ հավաքել՝ միջազգային հետաքննություն սկսելու նպատակով: