«Մենք այլևս ոչ մեկից թույլտվություն չենք խնդրի». Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան «այլևս ոչ մեկից թույլտվություն չի խնդրում կամ հետաքրքրված չէ ուրիշների կարծիքներով», երբ որոշումներ է կայացնում երկրի ազգային անվտանգության հետ կապված։
Նա նշել է, որ Անկարան անօդաչու թռչող սարքերի խոշորագույն արտադրողն է աշխարհում։

«Նախկինում մեզ զենք մատակարարողները հաշվում էին մեր արձակած փամփուշտների քանակը և պարբերաբար հաշվետվություն պահանջում։ Ահաբեկչության դեմ մեր պայքարում մենք մշտապես բախվել ենք խոչընդոտների։

Այժմ մենք հաղթահարում ենք բոլոր խնդիրները՝ օգտագործելով մեր սեփական արտադրության զենքերը։ Երբ մենք քայլեր ենք ձեռնարկում մեր ազգային անվտանգության հետ կապված, մենք այլևս ոչ մեկից թույլտվություն չենք խնդրում և չենք հետաքրքրվում ուրիշների կարծիքներով»,- ընդգծել է Էրդողանը։

Նրա խոսքով, Թուրքիան «այս կետում կանգ չի առնի՝ տարբեր ոլորտներում աշխատանք տանելով զսպող ուժ ձեռք բերելու համար», որը «վստահություն կներշնչի ընկերներին և վախ՝ թշնամիներին»։