Աֆղանստանում պատրաստվում են մահապատիժ սահմանել ամուսիններին դավաճանած կանանց համար

Աֆղանստանում պատրաստվում են մահապատիժ սահմանել կանանց համար՝ ամուսնական դավաճանության համար։ Նրանք հրապարակայնորեն քարկոծվելու են մինչև մահ: Այս մասին հայտարարել է թալիբների գերագույն առաջնորդ Հայբաթուլլա Ախունդզադան, փոխանցում է The Telegraph-ը։
«Դուք ասում եք, որ դա կանանց իրավունքների խախտում է, երբ մենք նրանց քարկոծում ենք մինչև մահ: Բայց մենք շուտով պատիժ կսահմանենք դավաճանության համար: Մենք կծեծենք կանանց հանրության առաջ: Մենք հրապարակավ քարկոծելու ենք նրանց մինչև մահ»,- սպառնացել է մոլլան արևմտյան պաշտոնյաներին ուղղված ձայնային ուղերձի ժամանակ, որը հեռարձակվել է աֆղանական հեռուստատեսությամբ։
Ըստ Ախունդզադայի, թալիբները պաշտպանում են մարդու իրավունքները «որպես Աստծո ներկայացուցիչներ», իսկ արևմտյան իշխանությունները «որպես սատանայի ներկայացուցիչներ»:
Նա նաև ասել է, որ միջազգային հանրության կողմից պաշտպանվող կանանց իրավունքները հակասում են իսլամական շարիաթի մեջ կանանց դերի մասին թալիբների մեկնաբանությանը: Նա խոստացել է կռվել Արևմուտքի դեմ ևս 20 և ավելի տարի:

Չնայած ավելի չափավոր կառավարություն ձևավորելու խոստումներին, թալիբներն արագ վերադարձան խիստ հանրային պատիժներին, ինչպիսիք են հրապարակային մահապատիժներն ու մտրակումները, նշում է The Telegraph-ը: