«Շատ մեծ զգուշացում է եկել մեր ակումբին, ֆեդերացիային». «Փյունիկի» գլխավոր մարզչի խնդրանքը

«Փյունիկի» գլխավոր մարզիչ Եղիշե Մելիքյանը Եվրոպա լիգայի որակավորման փլեյ-օֆֆ փուլի «Շերիֆի» դեմ առաջին խաղից առաջ խնդրանքով դիմել է երկրպագուներին. «Մեծ խնդրանք ունեմ երկրպագուներին, որոնք գալու են մարզադաշտ։ Ունենք-չունենք մի ստադիոն ունենք, որտեղ անցկացնում ենք մեր խաղերը։ Շատ մեծ զգուշացում է եկել մեր ակումբին, ֆեդերացիային, որ կարող են որակազրկել մեզ այս խաղերից, որովհետև երկրպագուների պահվածքը լինում է ագրեսիվ և ոչ կարգապահ։
Ուղղակի շատ եմ խնդրում․ մենք ձեր օգնության կարիքն ունենք, եթե ինչ-որ մի մասն ուզում է գալ մեզ խանգարելու, խնդրում եմ, մի՛ եկեք, մի՛ խանգարեք։ Մենք առանց այդ էլ հակառակորդ ունենք, որը փորձում է մեզ խանգարել։ Մեծ գումարների հետ է կապված, երբ երեխաները մտնում են դաշտ։ Ավելի լավ կլինի, որ այդ տուգանքների գումարները օգտագործենք ակադեմիայի և մեր երեխաների վրա։

Գուցե, երեխաները չեն հասկանում, թե ինչ խախտումներ են անում։ Խնդրում եմ ծնողներին, որ իրենք հետևողական լինեն։ 5,10, 15 հազար հոգու հնարավոր չէ վերահսկել միայն աշխատակիցներով։ Երկրպագուներն էլ մեկը մյուսին օգնելով, խրատ տալով կարող են թույլ չտալ, որ նման բաներ լինեն։ Ուղղակի շատ եմ խնդրում, պետք չէ։

Եթե ուզում են դուրս գալ խաղադաշտ, վազել, ապա ես խոսք եմ տալիս հաջորդ օրը կխնդրեմ այդ վազողները գան և քանի շրջան ուզում են իրենց հետ նաև ես կվազեմ։ Պաստառներ են պահում, մի հատ էլ ես պաստառ կպահեմ։ Բայց հաջորդ օրը։ Այդ օրը խնդրում եմ ոչինչ մի արեք»։