Թուրքիան ՀՀ-ի հետ բանակցությունների հատուկ բանագնաց է նշանակել ԱՄՆ-ի նախկին դեսպանին

«Միացյալ Նահանգներում Թուրքիայի նախկին դեսպան Սերդար Քըլըչը կնշանակվի Թուրքիայի հատուկ բանագնաց՝ Հայաստանի հետ հարաբերությունները կարգավորելու գործընթացում»,- ասել է Թուրքիայի արտգործնախարար Մևլութ Չավուշօղլուն, փոխանցում է TRT-ն։

«Հայաստանի հետ հարաբերությունների կարգավորման շրջանակներում մենք ԱՄՆ-ում Թուրքիայի նախկին դեսպան Սերդար Քըլըչին կնշանակենք մեր հատուկ ներկայացուցիչ»,- ասել է երկրի արտգործնախարարը։

Նշենք, որ 63-ամյա Սերդար Քըլըչը Թուրքիայի ԱԳՆ-ում աշխատում է 1984 թվականից։ 2008-ից 2010 թթ եղել է Լիբանանում Թուրքիայի դեսպանը, 2012-ից 2014 թվականներին՝ Ճապոնիայի դեսպան, այնուհետև 7 տարի ծառայել է որպես ԱՄՆ-ում արտակարգ և լիազոր դեսպան։

Նշենք, որ հայկական կողմից, ամենայն հավանականությամբ, հատուկ բանագնաց կնշանակվի ՔՊ-ական Ռուբեն Ռուբինյանը: