Երևան`   +11 °C
Այսօր`   Երեքշաբթի, 20 հոկտեմբերի, 2020 թ.

Պեղվել է խոշոր սենյակ՝ բազմաթիվ թոնիրներով. Տավուշ ամրոցը կդառնա Բերդի այցեքարտը

213
Չորեքշաբթի, 23 սեպտեմբերի, 2020 թ., 23:50
Պեղվել է խոշոր սենյակ՝ բազմաթիվ թոնիրներով. Տավուշ ամրոցը կդառնա Բերդի այցեքարտը

Տավուշ ամրոցը, որտեղ արդեն տևական ժամանակ է՝ պեղումներ են իրականացվում, միջնադարյան Հայաստանի կարևոր բերդերից մեկն էր: Բնակիչների շրջանում ամրոցը հայտնի է Ցլիկ Ամրամի բերդ անունով, ինչն, իհարկե, ունի պատմական հիմք: Սակայն միջնադարյան պատմիչների մոտ պահպանվել է հուշարձանի իսկական անվանումը՝ Տավուշ ամրոց: Ամրոցի կառուցման ստույգ թվականը հայտնի չէ, սակայն առաջին հիշատակությունները վերաբերում են 10-րդ դարին, իսկ հնագիտական ուսումնասիրություններով նրա գոյությունը վավերացվել է մինչև 14-րդ դար:

Տավուշ ամրոց կամ Ցլիկ Ամրամի բերդ
Տավուշ ամրոց կամ Ցլիկ Ամրամի բերդ

MAMUL.am-ը զրուցել է տեղում պեղումներ իրականացնող հնագետ, պատմաբան Տիգրան Ալեքսանյանի հետ: Ըստ նրա, ամրոցի մասնակի պեղումները կատարվել են 1980-ական թթ. վերջերին, հնագետ Հ. Եսայանի գլխավորությամբ: «Հիմա ձեռնարկել ենք ավելի լայնածավալ հնագիտական ուսումնասիրություններ, որոնց արդյունքները նոր լույս կսփռեն ամրոցի թվագրության, շինարարական փուլերի, նորոգումների, ճարտարապետական կառույցների մանրամասների և մի շարք այլ հարցերի վրա»,- վստահ է Տիգրան Ալեքսանյանը:

Պեղումներ Տավուշ ամրոցում
Պեղումներ Տավուշ ամրոցում

Հուլիսյան մարտական գործողություններից հետո, հրետակոծությունների հետևանքները վերացնելուց զատ, կառավարության կողմից խնդիր դրվեց նաև աշխատանքներ տանել համայնքների զարգացման ուղղությամբ: Այդ նպատակով Բերդի տարածաշրջանում զբոսաշրջության ակտիվացման համար կարևոր նախադրյալ համարվեց Տավուշ ամրոցը դարերի փոշուց վեր հանելը:

Պեղումներ Տավուշ ամրոցում
Պեղումներ Տավուշ ամրոցում

«Շատ ուրախալի է, որ նման ծրագրերի անբաժանելի մաս են դառնում պատմա-ճարտարապետական հուշարձանները: Նման նախաձեռնությունները նաև լավ հնարավորություն են՝ հանգամանալից հետազոտելու, ամրակայելու կամ վերականգնելու մեր պատմամշակութային ժառանգությունը:

Ներկայում հնագիտական աշխատանքները ակտիվ փուլում են: Վերջերս բացվել է ամրոցի միջնաբերդի տնտեսական խոշոր սենյակ՝ բազմաթիվ թոնիրներով:

Ջնարակված մոմակալ
Ջնարակված մոմակալ

Ամեն օր ի հայտ են գալիս անառիկ Տավուշ ամրոցի պատմությանը և կառուցողական մանրամասներին վերաբերող տարբեր գտածոներ, կառույցների մասեր, որոնք լրացնում են մեր գիտելիքները ամրոցի վերաբերյալ: Ցլիկ Ամրամի բերդը հավակնում է դառնալ Բերդ քաղաքի նոր այցեքարտը»: