Խաշթառակում դաժան ծեծի հետևանքով մահացած երեխայի մայրը մահացել է

Տավուշի մարզի Խաշթառակ գյուղում դաժանաբար ծեծված երեխայի մայրը մահացել է։ Այս տեղեկությունը MAMUL.am-ի թղթակցի հետ զրույցում հաստատեց Խաշթառակի համայնքապետ Անդրանիկ Վիրաբյանը։

Նա ասաց, որ կինը մահացել է Սևանի ԲԿ-ում, սակայն մահվան պատճառը նրան հայտնի չէ:

Փորձեցինք տեղեկություն ստանալ երեխաների վերաբերյալ, համայնքապետն ասաց, որ նրանք տեղափոխվել են մանկատուն:

Հիշեցնենք՝ 2020թ. օգոստոսի 14-ից 16-ն ընկած ժամանակահատվածում Տավուշի մարզի Խաշթառակ համայնքի 57-ամյա բնակիչը, իր հանգիստը խանգարելու պատճառով, 2014թ. ծնված անչափահաս թոռանը ձեռքերով, ոտքերով և փայտով բազմաթիվ հարվածներ է հասցրել, որի հետևանքով 6-ամյա երեխան վայր է ընկել, գլխով հարվածել է բազմոցի ոտնակին, ստացել կյանքի համար վտանգավոր բազմաթիվ վնասվածքներ և անգիտակից վիճակում տեղափոխվել «Արաբկիր» բժշկական կենտրոն:

Բացի այդ 57-ամյա տղամարդը 2020թ. օգոստոսի 14-ին, օգոստոսի 16-ին և դեռևս քննությամբ չպարզված ժամանակահատվածում, նույն պատրվակով պարբերաբար, դիտավորությամբ ձեռքերով և ոտքերով բազմաթիվ հարվածներ է հասցրել իր 2 անչափահաս թոռների մարմնի տարբեր մասերին՝ վերջիններին պատճառելով ֆիզիկական ուժեղ ցավ և հոգեկան տառապանք:

Օրեր անց՝ օգոստոսի 25-ին, ծեծի ենթարկված 6-ամյա երեխան մահացել է՝ այդպես էլ գիտակցության չգալով: