«Բացահայտվել է իմ դեմ հարուցված անհավատալի քրգործի նախապատմությունը». Ռուբեն Հայրապետյան

Հայաստանի պետական տնտեսագիտական համալսարանի ռեկտորի նախկին ԺՊ Ռուբեն Հայրապետյանը ֆեյսբուքյան իր էջում գրել է. «Եվ այսպես՝ ամբողջությամբ և պաշտոնապես բացահայտվել են իմ դեմ հարուցված անհավատալի քրեական գործի նախապատմությունը և դրա հեղինակները:

Այս զեկուցագիրը ներկայացնող անձը, որն ի պաշտոնե պիտի զբաղվեր ուսումնական աշխատանքներով, ՀՊՏՀ ռեկտորի ժ/պ-ի զարմանալի հանձնարարությամբ սկսել էր ուսումնասիրել մի շարք պարգևավճարներ ու արձակուրդներ և չգիտես՝ ինչու, հավանաբար, սեփական փորձից դատելով, որոշել, թե կա ընդամենը 2 տարբերակ՝ կա՛մ «կոռուպցիա և չարաշահում», կա՛մ «իրավական ակտերի չիմացություն»:
Ի՞նչ անուն տաս սրան...
Ինչպես արդեն հայտնի է, այդ նյութերի հիման վրա հարուցված քրեական գործը հետագայում ոչ միայն պաշտոնապես կարճվում է հանցակազմի բացակայության հիմքով, այլև ապացուցվում է, որ անգամ անմեղ խախտում թույլ չի տրվել:
Հատուկ ուսանողներիս համար պիտի ասեմ, որ վատ կառավարումն այն է, երբ, օրինակ, ՈւՍՈւՄՆԱԿԱՆ աշխատանքների գծով պրոռեկտորն իր գործի փոխարեն ռեկտորի հանձնարարությամբ զբաղվում է նախկին ֆինանսական տնօրենի արձակուրդի կամ էներգագետի պարգևավճարի «անօրինականության» սիրողական հետաքննությամբ՝ ԻՐԱՎԱՊԱՀՆԵՐԻՆ հանձնելու նպատակով: Լիազորությունների այսպիսի շփոթի դեպքում արդյունքը միշտ է նույնքան անհաջող լինում:
Հասկանում եմ, որ վերոնշյալ անձինք, հավանաբար, խոր հիասթափություն են ապրում իրենց տապալված բացահայտումների և բացահայտված տապալումների պատճառով, սակայն սա դեռ միայն սկիզբն է, որովհետև շուտով բոլոր գիտակից մարդիկ են իրենց գնահատականը տալու այս արարքներին, անգամ նրանք, ովքեր այս պահին աշխատանքը կորցնելու թերևս ընկալելի վախից դրդված մինչև հիմա շարունակում են իրենք իրենց լուռ համոզել, թե ոչինչ չեն նկատում:
Հերթն ատենախոսությանս հետ կապված անհասկանալի ապօրինի գործընթացներինն ու պիտակավորումներինն է, որոնց վերաբերյալ դատական հայց եմ ներկայացրել, և նախնական նիստը տեղի կունենա արդեն վաղը»: