«Սա՞ է հանդուրժողականության մթնոլորտը». Գևորգ Պետրոսյանն «Իմ քայլ»-ի պատգամավորին բանավեճի հրավիրեց

«Հայաստանում պետք է ունենաք անկախ արհեստակցական միություն: Սա հետաքրքրում է Հայաստանի հարյուր հազարավոր աշխատողներին, որոնք, թող ներվի ասելը, բայց ստրկական վիճակում են գտնվում գործատուների մոտ: Հիմա ի՞նչն է պատճառը, որ Ազգաին ժողովը չի ցանկանում այս էլ որերորդ անգամ ունենալ անկախ արհեստակցական միություն»,- ԱԺ-ում իր ելույթում ասաց «Բարգավաճ Հայաստան» խմբակցության պատգամավոր Գևորգ Պետրոսյանը՝ դիմելով «Իմ քայլը» խմբակցության պատգամվոր Արեն Մկրտչյանին: «Հանձնաժողովի նիստին գալ ուշացումով, չլսել իմ զեկույցը, որևէ բառ չասել նախագծի վերաբերյալ, բայց դրսում հարցազրույց տալ, ասել՝ այս նախագծի իմաստն աշխատողներին տոտալ վերահսկողության ներքո պահելն է: Ես ուսումնասիրել եմ պարոն Մկրտչյանի կենսագրությունը. ինքը 26 տարեկան է, իսկ ես՝ 23 տարի է համալսարանի իրավագիտության ֆակուլտետում եմ դասավանդում, 23 տարի զբաղվել եմ աշխատողների իրավունքների դատական պաշտպանությամբ ու էդ ո՞նց եղավ աշխատողների շահերը տոտալ վերահսկողության ներքո դնելու նախագիծ հեղինակեցի: Մենք այստեղ անընդհատ խոսում ենք, վարչապետի կողմից էլ է շեշտվում՝ սիրո, համերաշխության մասին, սա՞ է հանդուրժողականության մթնոլորտը՝ չմասնակցել նիստին, որևէ բառ չասել, դուրս գալ ապատեղեկատվություն տարածել, թե «Բարգավաճ Հայաստան»-ի ներկայացրած նախագիծն ուղղված է աշխատողների շահերի դեմ»,- իր ելույթում ասաց Գ. Պետրոսյանը՝ Ա. Մկրտչյանին հրավիրելով բանավեճի:

Արդյունքում, քվերակությամբ ԱԺ-ն մերժեց օրինագիծն ընդգրկել ԱԺ 2-րդ նստաշրջանի նիստերի օրակարգում: