Եզակի սպիտակ փղիկը, հնարավոր է, ալբիոնոս է

Բնության սիրահար 58-ամյա Նիքքի Քյորթցը կյանքում առաջին անգամ նկատել ու լուսանկարել է ալբինոս փղի, գրում է Powerful Mind-ը: Եզակի կենդանին ապրում է ՀԱՀ-ի Քրյուգեր ազգային պարկում:

Ըստ բնապահպանների՝ ալբինոսությունը իսկական պատիժ է կենդանու համար: Բաց գույնի մաշկով նրան հեշտությամբ նկատում են գիշատիչները, իսկ ալբինոսների մաշկն ու աչքերը շատ զգայուն են արևի լույսի նկատմամբ:

Ըստ կենդանաբան Յան Ուայթի՝ վայրի բնության մեջ ալբինոսներն ավելի հաճախ են հանդիպում, քան մենք կարծում ենք, պարզապես նրանք շատ կարճ կյանք են ունենում:

Ճիշտ է, դեռևս կասկածներ կան՝ արդյոք այս փղիկը ալբինոս է, թե շատ հազվադեպ հանդիպող սպիտակ փղերից է:

Ցավոք, Քյորթցի արված լուսանկարներից և ոչ մեկում չի երևում ձագի աչքերի գույնը: Բոլոր նկարներում փղիկի աչքերը կկոցված են, հնարավոր է, նա այդպիսով պաշտպանվում է արևի ճառագայթներից:

Սպիտակ փղերը փղերի եզակի տարատեսակ են, սակայն առանձին տեսակ չեն համարվում: Սպիտակ փղերի մաշկը բաց կարմրադարչնագույն է, որը թրջվելուց դառնում է բաց վարդագույն: