«ԱՄՆ-ը հույս ունի սեպ խրել ՀՀ-ի և ՌԴ-ի հարաբերություններում». Stratfor

Ամերիկյան մասնավոր հետախուզա-վերուծական Stratfor ընկերությունը հրապարակել է 2019թ. համար աշխարհի քաղաքական իրադարձությունների զարգացման իր կանխատեսումը:

Ամենամյա զեկույցում առանձնահատուկ տեղ են զբաղեցրել Հարավային Կովկասի իրավիճակն ու տարածաշրջանում ԱՄՆ-ի և Ռուսաստանի քաղաքականությունը:

«Կովկասում Վաշինգթոնը կենտրոնացած է Հայաստանի կառավարության հետ կապերի ամրապնդման վրա: Հայաստանն ավանդաբար Ռուսաստանի մտերիմ դաշնակիցն է, Մոսկվայի գլխավորած ԵԱՏՄ-ի և ՀԱՊԿ-ի անդամ, սակայն վերջին ամիսներին՝ ընդդիմադիր առաջնորդ Նիկոլ Փաշինյանի՝ իշխանության գալուց հետո, Հայաստանի և Ռուսաստանի միջև քաղաքական լարվածություն է նկատվում: ԱՄՆ-ը հույս ունի օգտագործել այդ լարվածությունը՝ Հայաստանի և Ռուսաստանի հարաբերություններում սեպ խրելու համար»,- գրում են Stratfor-ի վերլուծաբանները:

Ամենամյա զեկույցում ասվում է նաև, որ Հայաստանը, ամենայն հավանականությամբ, չի հրաժարվի Ռուսաստանի հետ ռազմավարական միությունից, սակայն առկա քաղաքական տարաձայնություններն ԱՄՆ-ին կօգնեն հասնել իր նպատակներին: Վերլուծաբանները նշում են նաև, որ Հայաստանի գլխավոր թշնամին Ադրբեջանն է, որը ևս Վաշինգթոնի ուշադրության կենտրոնում է, հատկապես, Իրանի դեմ ճնշումների հարցում: Միևնույն ժամանակ, ըստ վերլուծաբանների, ԱՄՆ-ը կմեծացնի անվտանգության ոլորտում Վրաստանի աջակցությունը, ինչպես նաև զորավարժություններ կանցկացնի Վրաստանի տարածքում: