Victoria’s Secret 2026-ի ցուցադրության տպավորիչ կադրերը

Վերջին տարիներին Victoria’s Secret-ը փորձում է միավորել երկու դարաշրջան՝ լեգենդար «հրեշտակների» ժամանակները և նոր իրականությունը, որտեղ սուպերմոդելների կողքին հայտնվում են ինֆլյուենսերներ, դերասանուհիներ ու տարբեր սերունդների հայտնի դեմքեր։ Երեկ Լոս Անջելեսում Victoria’s Secret-ը կրկին ներկայացրեց այս անսովոր միությունը։ Բազմամյա ընդմիջումից հետո պոդիում վերադարձավ Ռոզի Հանթինգթոն-Ուայթլին, Քայլի Ջենները դեբյուտ ունեցավ 50 միլիոն դոլար արժողությամբ Fantasy Bra կրծկալով, իսկ երաժշտական ծրագիրն ապահովեցին Tate McRae-ը, Megan Thee Stallion-ը, Megan Moroney-ն և KATSEYE խումբը։

Victoria’s Secret Fashion Show-ի բացումը միշտ վստահվել է պոդիումի գլխավոր աստղերին, ուստի այս տարի կազմակերպիչներն իրենց ընտրությունը կանգնեցրել են Բելլա Հադիդի վրա։ Ցուցադրությունն ավարտելու պատասխանատու դերը կազմակերպիչները վստահել էին Ադրիանա Լիմային՝ Victoria’s Secret-ի պատմության ամենաճանաչված «հրեշտակներից» մեկին։ Բրազիլացի սուպերմոդելը բրենդի հետ համագործակցում է 1990-ականների վերջից և մասնակցել է դրա ամենահայտնի ցուցադրություններին, ուստի նրա հայտնվելը պոդիումում յուրօրինակ վերադարձ էր դեպի ակունքներ։