«Երևանի կենտրոնում պարեկային ծառայությունը պետք է ավելի խիստ վերահսկողություն իրականացնի». Վահան Բաբայան

Ռեֆորմիստների կուսակցության նախագահ Վահան Բաբայանի ֆեյսբուքյան գրառումը․ «Երեկոյան ժամերին Երևանի կենտրոնի փողոցներում հաճախ կարելի է հանդիպել մեքենաների, որոնց վարորդները միտումնավոր բարձրացնում են շարժիչի ձայնը, «ճռիկներ» անում, գազ տալիս ու անշնորհք վարքով խանգարում քաղաքի բնակիչների և հանգստի իրավունք ունեցող մարդկանց անդորրը։
Սա մեքենա վարելու մշակույթ չէ, այլ պարզապես անպատասխանատու և լկտի պահվածք։
Երևանի կենտրոնում պարեկային ծառայությունը պետք է ավելի խիստ վերահսկողություն իրականացնի նման դեպքերի նկատմամբ։ Անհրաժեշտ է կանխել վտանգավոր ու ցուցադրական վարքը, ստուգել նման մեքենաների համապատասխանությունը սահմանված տեխնիկական և աղմուկի նորմերին ու օրենքի խախտման դեպքում կիրառել համապատասխան միջոցներ։
Քաղաքի կենտրոնը ոչ մեկի անձնական ավտոդրոմը չէ։ Յուրաքանչյուր վարորդ պետք է հասկանա՝ իր «զվարճանքը» չպետք է վերածվի հարյուրավոր մարդկանց անհանգստության։
Երևանը բոլորինն է, և քաղաքի փողոցներում պետք է տիրի կարգուկանոն, ոչ թե անշնորհքության մրցույթ»։