«Ահա թե ինչքան անկախ ենք այսօր»․ Մանուել Մանուկյան

Քաղաքական ակտիվիստ Մանուել Մանուկյանի ֆեյսբուքյան գրառումը. «Սիրելի՛ հայրենակիցներ, Սովետական տարիներին մենք, շատ դեպքերում, ավելի անկախ ենք եղել մեր որոշումների մեջ, քան այսօր։
Այն ժամանակ, երբ Հայաստանը Խորհրդային Միության կազմում էր, Ադրբեջանը չէր համարձակվում Հայաստանի իշխանություններին իր պահանջները թելադրել, առավել ևս՝ պահանջել, որ մեր երկրի ներսում Սահմանադրություն փոխվի, պատմություն վերագրվի, Ցեղասպանության մասին խոսքը լռեցվի, ազգային արժեքներից հրաժարվենք, կաթողիկոս ձերբակալվի, նախագահներ ձերբակալվեն և այլն։
Ես չեմ խոսում վերջին 30 տարիների մասին և չեմ համեմատում տարբեր ժամանակաշրջանների անկախության մակարդակը, որովհետև այսօրվա «անկախությունը» դրանց հետ ուղղակի համեմատելը խայտառակություն է։ Ես խոսում եմ հենց Խորհրդային Հայաստանի ժամանակների մասին։
Պատկերացրեք՝ Խորհրդային Միության կազմում գտնվելու տարիներին մենք այսօրինակ ճնշումներ չէինք տեսնում, իսկ այսօր, երբ ամեն օր «անկախության» մասին են խոսում, մեր երկրի ներսում հնչում են պահանջներ, որոնք գալիս են Ադրբեջանից։
Ուրեմն մի պարզ հարց.
Եթե իսկապես անկախ եք, ապա ինչո՞ւ եք կատարում Ալիևի պահանջները։
Եթե իսկապես ինքնիշխան եք, ապա ինչո՞ւ է Բաքվի ցանկությունը դառնում Հայաստանի ներքին քաղաքականության օրակարգ։
Անկախությունը դրոշը ծածանելը չէ։ Անկախությունը սեփական երկրի որոշումները սեփական ժողովրդի և սեփական պետական շահերի հիման վրա կայացնելու կարողությունն է։
Մնացածը՝ պարզապես բառեր են։
Հ.Գ․ Այս լուսանկարը լրիվ բավարար է, որ հասկանաք, թե ինչքան անկախ ենք այսօր»։