«Գիրքը կօգնի ինձ հասկանալ, թե ոնց հնարավոր դարձավ էն, ինչ որ եղավ». Մարինե Պետրոսյան

Բանաստեղծուհի Մարինե Պետրոսյանը ֆեյսբուքյան իր էջում գրել է․ «Արմեն Գրիգորյան։ Հայաստանի Անվտանգության խորհրդի արդեն նախկին քարտուղար։ Գիրք ա գրել Արմենը։ «Քայլ արա, մերժի՛ր Սերժին»։ 2018-ին կատարվածի մասին։ Մի քիչ առաջ գիրքը օնլայն պատվիրեցի որ կարդամ։
2018-ին նախորդող տարիներին Արմենի հետ բավական հաճախ էինք շփվում։ Ինքս քաղաքացիական շարժումների ակտիվ անդամ չէի, բայց երբեմն մասնակցում էի։ Քաղաքականությանը, ու մանավանդ՝ գրականությանը, փիլիսոփայությանը վերաբերող հարցերով երբ զրուցում էինք, զգում էի, որ մի քիչ պարզունակացնում ա ամեն ինչ Արմենը, բայց ընդհանուր՝ ազնիվ մարդու տպավորություն էր թողնում։
Իսկ հետո եղավ 2018-ը։ Ես ինքս փողոց դուրս եկածների մեջ չէի, բայց վտանգն էլ սկզբում չէի հասկացել։ Ու երբ «քայլ անողները» հաղթեցին, մի կարճ ժամանակ նույնիսկ ուրախացել էի, մտածում էի՝ տես, Մարինե, հոռետես էիր, մտածում էիր՝ էս շարժումն էլ բոլոր նախորդների նման կձախողվի, տեսա՞ր որ չձախողվեցին, ոգևորված ազնիվ ջահելներ են, գուցե իսկապե՞ս հիմա հնարավոր լինի Հայաստանում լավ փոփոխություններ անել։
Իսկ հետո եղավ, ինչ որ եղավ։ Եվ արցախցի Արմեն Գրիգորյանը մնաց Արցախի կորուստը ձեռքբերում համարող Նիկոլ Փաշինյանի թիմում։
Վերջին անգամ Արմենին մի տարի առաջ եմ տեսել, մեր Փափազյանի վրա։ Լավ չեմ հիշում՝ Քոչարի փողոցի հետ անցումն էր, թե Ավետ Ավետիսյանի, գնումների տոպրակները ձեռքիս սպասում էի, որ կանաչ լույսը վառվի անցեմ, մեկ էլ տեսնեմ՝ մեկը դիմացից ուշադիր ժպտում ա ինձ։ Արմեն Գրիգորյանն էր։ Տեսավ՝ չեմ բարևում, դեմքին տարակուսանք հայտնվեց․․․
Արմենի գիրքը պատվիրել եմ, դեռ չգիտեմ երբ կբերեն, բայց անպայման կարդալու եմ, որովհետև էդ տեքստը կօգնի ինձ հասկանալ կարևոր բաներ։ Կօգնի ինձ հասկանալ, թե ոնց հնարավոր դարձավ էն, ինչ որ եղավ։
Երբ որ գիրքը շուտով կարդամ, էս տեքստս կշարունակեմ»: