«Նախկին արատավոր բարքերը հայհոյող մարդիկ այսօր ավելի վատ բարքեր են տարածում»․ Նաիրի Հոխիկյան

Լրագրող Նաիրի Հոխիկյանը ֆեյսբուքյան էջում գրել է․ «Այս միտքս վարորդները լավ կհասկանան.
Երթևեկության մեջ երբ մեկը մեքենայով կտրուկ դուրս է գալիս քո մեքենայի դեմը և ստեղծում վթարային իրավիճակ, մտքումդ հայհոյում ես կարգազանց վարորդին ու նրա ազգուտակին, բայց երբ դու ես ուրիշի մեքենայի դիմացը կտրուկ վթարային վիճակ ստեղծում, մտքովդ չի անցնում, որ այդ մեկ ուրիշն էլ քո ազգուտակին է հայհոյում։
Երբ փորձում ես երթևեկության գիծ փոխել, իսկ ընթացող մեքենաները տեղ չեն տալիս, սկսում ես մտքումդ հայհոյել այդ մեքենաների վարորդներին, որ գոնե մեկը չի զիջում, հնարավորություն չի տալիս փոխել գիծը և շարունակել ճանապարհը, բայց երբ դու ես ընթանում և տեսնում ես գիծը փոխելու համար թարթիչը միացրած մեքենա, ինքդ չես զիջում ու հնարավորություն չես տալիս այդ մեքենայի վարորդին' փոխելու գիծը, և հաստատ մտքովդ չի անցնում, որ դու էլ ինչ-որ մեկի շուրթերին յոթ հարկանի հայհոյանքի հասցեատեր ես։
Ասածս այն է, որ երբ դու հայհոյում ես սրիկայություն անողին, ապա ինքդ էլ սրիկայություն մի արա, որ քեզ էլ ուրիշները չհայհոյեն։
Կյանքում բոլոր ոլորտներում է այդպես։
Նախկինում եղած արատավոր բարքերը, կոռուպցիան, կլանային շահերն ու բռնությունները հայհոյող մարդիկ այսօր ավելի վատ բարքեր են տարածում' ավելի շատ կոռուպցիա, ավելի շատ թայֆաբազություն, ավելի շատ բռնություններ' երևի չհասկանալով, որ նախկինում իրենց հայհոյանքը նույնկերպ հիմա վերադառնում է' ուրիշների շուրթերով։