«Ո՞վ և ինչի՞ համար է այդպես «զոհաբերում» Հայաստանի ԱԱԾ-ն». Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը. «Հովիկ Աբրահամյանի որդու ձերբակալության առնչությամբ, ուշադրության արժանացնեմ մեկ այլ հանգամանք։ Տեսարանային հանգամանքի և դրա մոտիվների հարցը քննարկվում ու մեկնաբանվում է շատ։

Մի բան սակայն կարծես թե դուրս է մնում ուշադրությունից։ Հերթական անգամ մենք տեսնում ենք պատկեր, երբ ԱԱԾ հատուկ ստորաբաժանումը «դրսևորվում» է այսպես ասած՝ անհարկի, ինչի հետևանքով հանրության մոտ առնվազն ենթագիտակցաբար առաջանում է այդ ստորաբաժանման ու առհասարակ կառույցի հանդեպ որոշակի անլուրջ ընկալում։

Մարդիկ տեսնում են, որ ինչ-որ բարդույթի կամ քմահաճույքի համար ԱԱԾ հատուկ ստորաբաժանումն օգտագործվում է մի իրավիճակում, երբ ակնհայտորեն չկա ոչ մի բարդություն, ոչ մի մասնագիտական հմտության կարիք, չկա որևէ այդպիսի գործողության կարիք առհասարակ։ Հատուկ ստորաբաժանումն օգտագործվում է մի իրավիճակում, երբ չկա որևէ դիմադրություն, չկա որևէ փախուստ, որևէ վտանգ։

Մինչդեռ, այդ կառույցը և հատկապես հատուկ ստորաբաժանումն ունի հենց հատուկ դեր, հենց հատուկ դեպքերի և իրավիճակների համար է այդ ստորաբաժանման ու կառույցի նշանակությունը։ Եվ այդ դեպքերի շնորհիվ է նաև ձևավորվում հանրային հեղինակություն ու հարգանք՝ մասնագիտության, մասնագիտական առաքելության, պետական առաքելության հանդեպ։

Երբ ինստիտուցիոնալ–ֆունկցիոնալ կիրառումը ակնհայտորեն անհարկի է, ակնհայտորեն՝ իրավիճակով չպահանջված և «չպատճառաբանված», ապա առնվազն ենթագիտակցորեն ձևավորվում է հասարակության անլուրջ ընկալում, այն էլ մի կառույցի հանդեպ, որի հանրային վարկն ու հեղինակությունը այդուհանդերձ ունեն հիմնարար նշանակություն ցանկացած պետության համար։

Եվ հետևաբար, ինձ համար այստեղ հարց է առաջանում, թե ո՞վ և ինչի՞ համար է այդպես «զոհաբերում» Հայաստանի ԱԱԾ, ԱԱԾ հատուկ ստորաբաժանումների հեղինակությունը, դնում այդ կառույցը այդպիսի անհամաչափ, հետևաբար հանրային ընկալման տեսանկյունից վերը նկարագրածս ռիսկը ենթադրող իրավիճակներում»։