«Չգիտեմ՝ քաղաքական է, թե ոչ, բայց շատ բաներ են իրար հետ զուգադիպում»․ Արմեն Ներսիսյան

«Երկուշաբթին մեզ մոտ հանգստյան օր է, երբ երեքշաբթի եկել ենք աշխատանքի, տեսել ենք 26 տաղավար կապարակնքված է և չգիտենք, թե ինչի համար են փակել։ Մենք էլ չգիտենք ինչու է փակվել ու չենք կարողանում աշխատողների հարցերին պատասխանել»,- լրագրողների հետ զրույցում ասաց «Առինջ մոլ»-ի փոխտնօրեն Արմեն Ներսիսյանը։ «Կապարակնքված տաղավարները արդեն 5 տարի է աշխատում են, հարկեր են վճարում նաև պետությանը․ նո՞ր տեսան, որ կառուցվել են բարձր լարման հոսանքալարերի տակ։ Հիմա քաղաքական է, թե ոչ՝ չգիտեմ, միայն կասեմ, որ շատ բաներ են իրար հետ զուգադիպում։ Ծառուկյանի կալանավորումից 2 օր առաջ այստեղ ստուգումներ են եղել՝ սա էլ երևի պատասխանն է։
Ինչ մեղք ունեն այս մարդիկ, այսքան տարի աշխատել են, ծրագրեր ունեն, վարկեր ունեն, ի՞նչ անեն։ Մենք էլ չենք կարողանում նրանց հարցերին պատասխանել, որովհետև մենք էլ չգիտենք, թե երբ է բացվելու։ Օրենքի սահմաններում մեր իրավաբանները զբաղվում են այս հարցով»,- ասել է նա: