«Սաակաշվիլու ողբերգական պատմությունն ուսանելի է հետխորհրդային երկրների համար»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Բի Բի Սին փաստագրական ֆիլմ է նկարել 2012 թվականին, որը կրում է Путин, Россия и Запад վերնագիրը:
Իմ ընկերներին և հետևողներին խորհուրդ եմ տալիս դիտել այն, ուղիղ 4 ժամ է, բայց ամբողջովին հասկանալի է դարձնում (դա չի նշանակում՝ արդարացնում) նաև այսօրվա ռուս-ուկրաինական եղբայրասպան պատերազմը, ռուսական ներխուժումն Ուկրաինա: Ես ֆիլմը դիտել եմ մի քանի անգամ, այդ թվում՝ այս գիշեր՝ հերթական անգամ:
Վրաստանի և Սաակաշվիլիի հետ մի պահ կա, որ արտակարգ հետաքրքրիր է: Ուրեմն, ամերիկացիներն ու եվրոպացիները վրացի պաշտոնյաներին բազմաթիվ խորհուրդներ են տալիս, թե ռուսների հետ հարաբերություններում հատկապես ինչ չպետք է անել, բայց դրանցից մեկը, որ նշում է Լեհաստանի արտգործնախարարը հետևյալն է՝ Ռուսաստանի հետ հարաբերություններում Վրաստանն ունի մի կարևոր առավելություն և խաղաքարտ, դուք տուժած կողմն եք, դուք չանեք քայլեր, որ կորցնեք այդ առավելությունը: Վրաստանը, կարծելով, որ հավաքական Արևմուտքը գալու և փրկելու է իրեն, չլսեց այդ կարևոր խորհուրդը, հարձակվեց Հարավային Օսիայի ուղղությամբ և եղավ այն, ինչ եղավ: Անշուշտ, ռուսները սադրեցին, բայց չպետք էր տրվել այդ սադրանքին: Այս պատմությունը կարող է ուսանելի բոլոր այն երկրների համար, ովքեր 100 տարի համոզված են լինում, որ իրենց փրկիչները ռուսներն են, հետո 180 աստիճան շրջվում և վստահ են լինում, որ նոր փրկիչ են գտել մի այլ տեղ՝ Եվրոպայում կամ Ամերիկայում:
Ընդհանրապես, Սաակաշվիլու ողբերգական պատմությունը խիստ ուսանելի է Ռուսաստանի հարևանությամբ գտնվող տարածքի երկրների համար, որոնք մի ժամանակ կոչվում էին հետխորհրդային»։