«Էն տեմպը, որով աճում է մարդատար մեքենաների քանակը, գործողություններ է պահանջում». Տիգրան Ավինյան

«Մեր խնդիրները մեծապես և ուղղակիորեն կապված են մարդատար ավտոմեքենաների քանակի աճի հետ: Այո՛, արհեստական բանականությամբ լուսացույցների ներդրումը մեր ծրագրերում է, այո՛, հանրային տրանսպորտի համար առանձնացված գծերը մեր առաջնահերթությունն է լինելու»,- գործակարգավարական խորհրդակցության ժամանակ ասաց քաղաքապետ Տիգրան Ավինյանը՝ հավելելով. «Եթե մենք որոշակի նոր կանոնակարգեր ու կառուցակարգեր չստեղծենք քաղաքում, գնալով ահագնացող մարդատար մեքենաների քանակը, որոնք առանց սահմանափակման մտնում են քաղաք ու փոքր կենտրոն, ուղղակիորեն բերելու են մի իրավիճակի, երբ որևէ մեկն իր ավտոմեքենայով բակից դուրս գալուց հետո, չի կարողանալու առաջ շարժվել: Էն տեմպը, որով աճում է մարդատար մեքենաների քանակը, տրամաբանական գործողություններ է պահանջում»: Նա նշեց՝ մարդիկ պետք է հասկանան, որ ավելի լավ է օգտվել հանրային տրանսպորտից, այլ ոչ թե սեփական մեքենայից: