«Ի՞նչ են անում ՌՈ ծառայողներն անցակետերում»․ լրագրողը՝ Սուրեն Պապիկյանին

«Կադրեր են տարածվում, որ Հայաստան ժամանողներին 25-օրյա վարժական հավաքին մասնակցելու ծանուցագրեր են բաժանվում»,- «Ֆակտոր»-ի լրագրողը դիմեց ՀՀ պաշտպանության նախարար Սուրեն Պապիկյանին։ «Չկա նման բան։ Ծանուցման համար կա կարգ, ծանուցումը սովորաբար լինում է՝ ըստ այդ կարգի։ Այնտեղ ծանուցում իրականացնել ֆիզիկապես հնարավոր չէ։ Օդանավակայանում ոչ մեկին չեն կարող ծանուցագիր տալ»,- պատասխանել է նախարարը։

Հարցին, թե ի՞նչ են անում ՌՈ ծառայողներն անցակետերում, Պապիկյանը պատասխանել է․ «Ռազմական ոստիկանությունը ֆունկցիաներ ունի, որն իրականացնում է՝ ըստ անհրաժեշտության։ Դա կարող է լինել օպերատիվ ինֆորմացիայի հիման վրա, կարող է լինել այլ ֆունկցիոնալ պարտականությունների շրջանակներում, այդ թվում՝ նաև հետախուզվող անձանց փնտրտուքի շրջանակներում»։
Հարցին՝ նա բացառո՞ւմ է, որ Ռուսաստանից եկածներին կարող են 25-օրյա ծանուցագրեր տալ՝ Պապիկյանը պատասխանել է. «Ինչպե՞ս կարող եմ բացառել դա։ Այսինքն՝ Ռուսաստանից եկող ՀՀ քաղաքացին, ով զինապարտ է, հայրենիքի առաջ պարտականություններ չունի՞։ Բնականաբար, չեմ կարող բացառել։ Ոչ միայն Ռուսաստանից, այլ նաև Ֆրանսիայից, ԱՄՆ-ից․․․, բայց չեմ ասում, որ բոլորին ուղարկում են»։