«Սա գեոպոլիտիկ հիպնոսի հերթական սեանսի փորձ է»․ Սուրեն Սահակյան

Հասարակական-քաղաքական գործիչ Սուրեն Սահակյանի ֆեյսբուքյան գրառումը․ «Օր չի անցնում, որ մի 6-20 ռուս բարձրաստիճան պաշտոնյա մեծ հանդիսավորությամբ Հայաստանին սարսափելի պատիժներով ու տնտեսական ապոկալիպսիսով չսպառնա։ Ամեն օրվա հետ մոսկովյան տեղեկատվական կայծակների հուր-կրակը ավելի մոտիկից ու բարձր ա հնչում։ Ու էս սաղ «սրբազան պատերազմը» իբրև թե մղվում ա մի բանի դեմ․ Հայաստանի՝ ԵՄ անդամակցության հնարավորության դեմ, որ լավագույն դեպքում ակտուալ կդառնա 2045-2050 թվերի կողմերը։ Հայաստանի կառավարությունը, մինչդեռ, էս ամեն ինչին հետևում ա գազանանոցի կուշտ ռնգեղջյուրի հանդարտությամբ՝ վստահեցնելով, թե վերջում սաղ լավ է լինելու։ Որովհետև գիտի՝ ինչ է լինելու վերջում։
Սա գեոպոլիտիկ հիպնոսի հերթական սեանսի փորձ ա, որտեղ «ծեծողն» ու «ծեծվողը» նույն բեմականացված պիեսի նոտաներով են խաղում։ Վերջում էլ հոնորարը նույն կասսայից են ստանալու։ Նպատակն ակնհայտ է՝ հանրության մեջ հակառուսական տրամադրություններ սնել, որպեսզի էդ բացասական էներգիան ուղղեն նրանց դեմ, որոնց ապրիլի 1-ին Պուտինն անձնապես հավաստանշել է որպես «Ռուսաստանի ընկերներ», ինչով փուռն է տվել իրեն որպես տեր ընկալողներին (ոչինչ, նրանք նեղանալու ձև չունեն)։ Զուգահեռաբար, ռուս-ադրբեջանական ակնհայտ կամ քողարկված մեդիաներով ՔՊ-ի քչից-շատից մրցակից բոլորի ճակատին խփում են «ռսի շպիոնի» կնիքը։ Արդյունքում Փաշինյանը հերթական անգամ դառնում է «ինքնիշխանության» համար պայքարող սպիտակ թիկնոցով ասպետը, որի առաջ ընտրական դաշտը Մոսկվան ու Բաքուն են հետևողական մաքրել։
Թվում է, թե հաղթանակի հարցը լուծել են, էլ ի՞նչ են շարունակում վնասարարությամբ զբաղվել։ Բայց՝ չէ։ Նիկոլը դեռ քարոզարշավից առաջ է հայտարարել, որ իրեն մի շատ կարևոր բան է պետք՝ ԱԺ սահմանադրական մեծամասնություն։ Դրա համար էլ նախընտրական դժոխքը դեռ շարունակվում է։
Էս գրառումը կարող եք պահել ապագայի համար։ Եթե պրոցեսների էս անատոմիան ճիշտ է, ապա հունիսի 7-ից անմիջապես հետո արդեն իսկ կիրառված «պատժամիջոցներն» աստիճանաբար թուլանալու են, իսկ Պուտին-Փաշինյան հերթական հանդիպումից հետո ընդհանրապես անհետ կորչեն։ Ճիշտ նույն կերպ, ոնց ադրբեջանական ինքնաթիռը խոցելուց հետո «աստվածաշնչյան» հրաշակերպություն տեղի ունեցավ՝ Պուտին-Ալիև հանդիպումից հետո ազդարարված ռուս-ադրբեջանական մոտալուտ պատերազմն ուղղակի ջրվեց։
Մեր էմոցիաները մեծածախ առևտրի առարկա են դարձրել, ընկերնե՛ր։ Իսկ ինձ խորապես տհաճ ա, երբ քաղաքական ժուլիկների մի անարգ խումբ ինձ փորձում է «բմբուլով աբորիգենի» տեղ դնել։ Ափսոս, որ շատերը սրանում համոզվելու են, երբ իրենց ընտրությունն արդեն իսկ կայացրած կլինեն»: