«Իսրայելը Լիբանանի հարավում ոչնչացրել է «Հեզբոլլահի» շուրջ 1000 օբյեկտ»․ ՑԱՀԱԼ

Իսրայելի պաշտպանության բանակը (ՑԱՀԱԼ) հայտարարել է Լիբանանի հարավում «Հեզբոլլահ» շարժման կողմից օգտագործվող հազարավոր օբյեկտների և կառույցների ոչնչացման մասին:

«ՑԱՀԱԼ-ի զորքերը՝ 91-րդ դիվիզիայի հրամանատարության ներքո, Լիբանանի հարավում ոչնչացրել են ահաբեկչական ենթակառուցվածքի ավելի քան 1000 օբյեկտ, որոնք օգտագործվել են «Հեզբոլլա»-ի կողմից՝ ՑԱՀԱԼ-ի ուժերի դեմ հարձակումներ իրականացնելու համար, այդ թվում՝ ականապատված կառույցներ և շենքեր, որտեղ պահվում էր զենք», - ասվում է հաղորդագրության մեջ։ Սակայն չի նշվում, թե ինչ ժամանակահատվածում է ոչնչացվել այդքան մեծ քանակությամբ օբյեկտներ։

Հաղորդագրության մեջ նշվում է, որ հայտնաբերվել են հարյուրավոր զենքեր, այդ թվում՝ ավտոմատներ և գնդացիրներ, նռնակներ և ականներ, ինչպես նաև հակատանկային հրթիռներ և տարբեր զինամթերք։