Կոլումբիայում կործանվել է ռազմական ինքնաթիռ, որում, հնարավոր է, մինչև 125 զինվորական կար

Կոլումբիայի ռազմաօդային ուժերի «Հերկուլես» ռազմական տրանսպորտային ինքնաթիռը կործանվել է երկրի հարավում՝ թռիչքից կարճ ժամանակ անց։ Պաշտպանության նախարար Պեդրո Սանչեսը հայտարարել է, որ ինքնաթիռում կարող է լինել մինչև 125 մարդ։

Պաշտպանության նախարարի խոսքով՝ ինքնաթիռը թռիչք է կատարել Պուերտո Լեգուիզամո քաղաքից՝ Պուտումայո դեպարտամենտում, և տեղափոխում էր զինվորական անձնակազմ։ Նա նշել է, որ զոհերի ճշգրիտ թիվը և վթարի պատճառը դեռևս պարզված չեն։ Զինվորական ստորաբաժանումներն արդեն աշխատում են դեպքի վայրում։ Caracol հեռուստաալիքի տվյալներով՝ վթարի նախնական պատճառը կարող է լինել թռիչքից հետո մանևրելու դժվարությունները։ Ինքնաթիռը չի կարողացել հասնել անհրաժեշտ բարձրությանը։ Հեռուստաալիքը հայտնել է, որ ինքնաթիռում եղել են անձնակազմի 11 անդամ և 27-րդ բրիգադի 114 զինվոր, որոնք մասնակցում էին տարածաշրջանում ռոտացիային, սակայն այս տեղեկատվությունը պաշտոնապես հաստատված չէ։