«Մեղքի բաժին չեմ տեսնում․ վերափոխվել են այնպիսի ծառայություններ, որտեղ նախկինում սկի մկրատ և թել չկար»․ Անահիտ Ավանեսյան

«Ձեր ենթակայության տակ գործող «Քրեակատարողական բժշկության կենտրոն» ՊՈԱԿ-ում մարդիկ մահանում են»,- ճեպազրույցի ժամանակ լրագրողը դիմեց առողջապահության նախարար Անահիտ Ավանեսյանին։ «Աշխարհի լավագույն բժշկական կենտրոնում էլ լինում են մահվան դեպքեր։ Այդպիսին է մարդու կյանքը։ Բժշկական կենտրոնների, նաև ՊՈԱԿ-ի խնդիրն է ապահովել նոր ստանդարտներով ժամանակակից բժշկական օգնություն, ինչը մենք արել ենք։ Չկա մեկ անձ, ով ունի օբեկտիվ բժշկական օգնության կարիք և նրան այդ օգնությունը ցույց չի տրվում»,- մեկնաբանեց Անահիտ Ավանեսյանը։ «Ձեր մեղքի բաժինը չեք տեսնո՞ւմ»,- հետաքրքրքվեց լրագրողը։ «Ես մեղքի բաժին չեմ տեսնում, որովհետև հենց իմ նախարար լինելու ընթացքում արվել է այնքան աշխատանք, ամբողջական վերափոխվել են այնպիսի ծառայություններ, որտեղ նախկինում սկի մկրատ և թել չկար, անգամ սարքերը, որոնք դրված էին՝ բուտաֆորիկ էին»,- ի պատասխան նշեց առողջապահության նախարարը։