«Անիմաստ թեմաներով քննարկումների փոխարեն ճիշտ կլիներ կանխատեսել Ադրբեջան-Իրան հնարավոր զարգացումների հետևանքները». Գարիկ Քեռյան

Քաղաքագետ Գարիկ Քեռյանի ֆեյսբուքյան գրառումը. «Եկող տեղեկատվությունը, Բաքվի և Թեհրանի միմյանց ուղղված բացասական ոճով հռետորաբանությունը հիմք են տվել վերլուծական հետազոտական կենտրոններում կանխատեսել Ադրբեջանի ներգրավումը Իրանի դեմ պատերազմում: Եթե ԱՄՆ-ի և Իսրայելի ճնշման տակ դա տեղի ունենա, հետևանքները Ադրբեջանի համար լինելու են ծայրահեղ լավ կամ ծայրահեղ վատ: Միջին տարբերակը քիչ հավանական է: Ծայրահեղ լավի դեպքում, եթե Իրանը պարտվի, որպես փոխհատուցում Ադրբեջանը կարող է միացնել Իրանի կազմում գտնվող սահմանակից երկու նահանգները՝ Որոնք նույնպես կրում են Ադրբեջան անվանումը և թյուրքախոս են: Ծայրահեղ վատի դեպքում հակաիրանական կոալիցիային չի հաջողվում հասնել անվերապահ կապիտուլյացիայի, իսլամական վարչակարգը և երկրի տարածքային ամբողջականությունը պահպանվում է: Այս դեպքում արդեն օրակարգի հարց է դառնում Բաքվում կառավարող վարչակարգի հեռացման և երկրի էներգառեսուրսների և էներգետիկ կապուղիների պատկանելիության ու վերահսկողության խնդիրը: Բացառված չեն տարածքային փոփոխություններ: Երևանում ծիծաղելի թեմաներով անիմաստ քննարկումների փոխարեն ճիշտ կլիներ կանխատեսել այս հնարավոր զարգացումների հետևանքները»: