«Քաղաքացին «ապագա» է գոռացել, բայց «նախկինի» մասին հեքիաթն է շարունակում լսել»․ Վահագն Սարոյան

Ռազմական փորձագետ Վահագն Սարոյանի ֆեյսբուքյան գրառումը․ «Ո՞վ է հիշում կամ ով գիտի, ինչ նորություն կա Աջափնյակի մետրոյից: Արդեն սարքե՞լ են...
Ոչ իհարկե՝ դա եղել է հերթական օդ-փուչիկային նախագիծը, որը տարիներ շարունակ խոսում ու ներկայացնում էին որպես նորույթ, քաղաքի զարգացում, որպես պատմական քայլ, որպես զարգացման խորհրդանիշ։
Բայց իրականությունը պարզ է՝ 7 տարի նույն դասարանում մնացած թիմը ո՞նց կարող է մետրոյի կայարան կառուցել: Իրենց մոտ շուտ փշրվող ասֆալտն է լավ ստացվում:
Դրա համար, Երևանի մետրոպոլիտենի Աջափնյակի կայարանը մինչ օրս չկա։ Չկա շինարարություն, չկա շահագործում, կա միայն աղմուկ դրա մասին։
Իսկ հիշո՞ւմ եք, «Սեպուհ 1» հայկական մեքենաների արտադրության մասին մեծ-մեծ հայտարարությունները... Թե բա «Հայաստանը մտնում է ավտոմոբիլային շուկա», «հայկական մեքենա», «նոր էջ տնտեսության մեջ» ևայլն...
Իսկ ի՞նչ ունենք այսօր։
Ոչ գործարան, ոչ սերիական արտադրություն, ոչ շուկա, պատկերը նույնն է՝
մեծ հայտարարություններ, ընտիր ինքնաPR, հետո ինչպես միշտ՝ «թռնել սեփական խոստումներից»:
Այսօրվա կառավարիչները սիրում են աղմկել նախագծի մասին, գովել, գովերգել ու ոչինչ չանել: Նախագիծը կամ դրա իրականացումը կարևոր չէ այս իշխանությունների համար, այլ կարևոր է դրա շուրջ ստեղծված աղմուկն ու PR-ը:
Այն ինչը հայտարարել են այսքան ժամանակ՝ հավելելով, թե շուտով լավ կլինի, այս 8 տարիների ընթացքում միայն վատ է եղել, քաղաքացին «ապագա» է գոռացել, բայց միշտ «նախկինի» մասին հեքիաթն է լսել... ու շարունակում է լսել:
Եթե քաղաքացին հարցնի, թե ի՞նչ ավարտված գործեր կան, իրականում ցույց տալու բան ՉԿԱ: Տեսարանները միայն աղմուկի մասին են»: