Չինաստանն իր քաղաքացիներին առաջարկել է հեռանալ Իրանից և չայցելել այդ երկիր

Չինաստանը կոչ է արել իր քաղաքացիներին զերծ մնալ Իրան այցելելուց, իսկ արդեն երկրում գտնվողներին՝ հնարավորինս շուտ լքել այն, հաղորդել է The Global Times-ը։

«Հաշվի առնելով Իրանում տիրող անվտանգության իրավիճակը, Չինաստանի արտաքին գործերի նախարարությունը և Իրանում Չինաստանի դեսպանատունն ու հյուպատոսությունները հիշեցնում են չինացի քաղաքացիներին զերծ մնալ Իրան մեկնելուց», - հրատարակությունը մեջբերում է Չինաստանի արտաքին գործերի նախարարության հյուպատոսական գործերի վարչության հայտարարությունից մի հատված։

Այնտեղ նշվում է, որ «Իրանում արդեն գտնվող Չինաստանի քաղաքացիները պետք է ուժեղացնեն անվտանգության միջոցառումները և հնարավորինս շուտ լքեն երկիրը»։

«Իրանում և հարևան երկրներում Չինաստանի դեսպանատունը և հյուպատոսությունները անհրաժեշտ օգնություն կցուցաբերեն Չինաստանի այն քաղաքացիներին, ովքեր ցանկանում են մեկնել առևտրային չվերթներով կամ ցամաքային ճանապարհներով», - ասվում է հրատարակության մեջ։