«Արցախը բարտեր է արվել մի քանի վագոն էժան դիզվառելիքի, անասնակեր ցորենի հետ». Սևակ Խաչատրյան

Վաղարշապատի ավագանու ընտրություններում երկրորդ տեղը գրաված ընդդիմադիր «Հաղթանակ» դաշինքի ցուցակը գլխավորած Սևակ Խաչատրյանը գրում է. «Ընդամենը 2 օրվա մեջ Ալիևը Հայաստանից այնքան քծնանքի ու շողոքորթության դոզա ստացավ, որքան Էրդողանը չի ստանում Ադրբեջանից։ ՀՀ նախագահը շնորհակալություն է հայտնում հայատյաց և մարդասպան Ալիևին, իսկ Արսեն Գարդասիլ-Թորոսյանը գրառում է կատարում՝ նշելով, մեջբերում եմ՝ «...տեղեկացնում եմ, որ Ադրբեջանի Հանրապետությունում (Ղարաբաղում)...»։ Կհիշեք, երբ սրանից ընդամենը մի քանի տարի առաջ, երբ մեր պետականության ներքին թշնամիների մոտ խնդիր էր առաջացել ողբերգության և Արցախի կորստի հանգամանքը սղացնելու համար, վերջիններս մի քանի հազարի հասնող ֆեյքերով տարածում էին, որ՝ «Քոչարյանը 30 տարի առաջ էր ծախել Արցախն ու Մեղրին»։ Այսօր արդեն, հազարավոր ֆեյքերի ու Քոչարյանի՝ «Մեղրին ու Արցախը ծախելու» բարբաջանքի անհրաժեշտությունը չկա, քանի որ ապրում ենք մի իրականության մեջ, երբ Արցախը բարտեր է արվել մի քանի վագոն էժան դիզվառելիքի, իսկ արցախահայության տեղահանումը մի քանի վագոն անասնակեր ցորենի հետ։
Այս անկասելի թվացող բարոյականության և լինելիության գահավիժումը կասեցնելը բառացիորեն բոլորիս գործը պետք է լինի, բոլոր նրանց, ովքեր իրենց համարում են հայ և Հայաստանի քաղաքացի։ Հայաստանի լինելը բառացիորեն կախված է յուրաքանչյուր մարդուց՝ հովվից մինչև բանկիր, բանվորից մինչև գործարար․․․
Ճակատագիրն այս անգամ մեզ չի ներելու անտարբերության համար, սա մեր վերջին շանսն է»։