«Զանգվածների կառավարման ձևը սկզբունքային փոփոխության է ենթարկվել»․ Արման Մելիքյան

Արցախի ԱԳ նախկին նախարար Արման Մելիքյանի ֆեյսբուքյան գրառումը. «Քաղաքական ասպարեզ սպրդած արկածախնդիր ժուլիկներն ու աֆերիստները միմյանց անմիջապես են տեսնում ու ճանաչում: Ու միմյանց հետ էլ վերազգային, անձնական համագործակցության դաշտ են ձևավորում՝ ընդդեմ սեփական ու բոլոր մնացած ժողովուրդների:
Զանգվածների կառավարման ձևը հատկապես վերջին 20-30 տարիների ընթացքում սկզբունքային փոփոխության է ենթարկվել։ Մարդն ինքը՝ չի փոխվել, սակայն մարդկանց կառավարումը արմատապես ձևափոխվել է։ Եթե նախկինում կառավարիչները ենթակա զանգվածներն ուղղորդելու ու, նաև, հնազանդության մեջ պահելու համար ընդհանուր արժեքների ու բարոյական դրույթների ուժն էին գործի դնում, ապա վերջին շրջանում նկատելի է, որ հասարակություններին ավելի հեշտ է ուղղորդել մարդկանց հոգիներում չարություն ու ծայրահեղ եսակենտրոնություն սերմանելու միջոցով։ Եթե առաջ բարոյականությունն էր կառավարման արդյունավետ գործիք, ապա այժմ այդպիսի գործիք է դարձել մարդկանց ուղղորդված բարոյազրկումը։ Ավելի հեշտ է կառավարել ու չզրկվել իշխանությունից, եթե մարդիկ միմյանց ատում են ու չեն վստահում և հենց այդ պատճառով են դառնում կառավարիչների կամակատարը։ Կորցնում են հանուն ընդհանուրի ինքնաբուխ համախմբվելու ունակությունը, քանի որ այդ ընդհանուրն է նպատակասլաց կերպով ոչնչացվում։ Սա նաև պատասխանատվության հասցեականության խնդիրն է մեջտեղից հանում՝ կառավարիչների անհատական պատասխանատվությունը ջնջվում է, իսկ դրանց գործողությունների հետևանքների բեռն էլ դրվում է կոնկրետ հասարակության յուրաքանչյուր անդամի վզին»։