«Զորակոչն իրականացվում է առողջության հաշվին». Մհեր Կարագոզյան

«Հանրային վերահսկողություն» ՀԿ նախագահ Մհեր Կարագոզյանի ֆեյսբուքյան գրառումը. «ԱՆՕՐԻՆԱԿԱՆ ԶՈՐԱԿՈՉ
Այս հրապարակումը մի կոնկրետ ընտանիքի մասին չէ միայն։
Սա համակարգային ճնշման, անտեսված առողջության և օրենքի շրջանցման մասին է։
Զինակոչիկ Գ. Հ.-ի (2006թ․ ծնված) նկատմամբ իրականացվել է զորակոչային գործընթաց, որի ընթացքում բժշկական հանձնաժողովը սահմանափակվել է միայն որոշ մակերեսային հետազոտություններով (լյարդ, ողնաշար, հարթաթաթություն) և նրան ճանաչել է ծառայության համար պիտանի։
Սակայն չեն հետազոտվել և չեն քննարկվել լրջագույն առողջական խնդիրներ, մասնավորապես՝
գլխուղեղի ՄՌՏ հետազոտությամբ հայտնաբերված օրգանական փոփոխություններ և ադենոմա,
պարբերաբար արձանագրվող ծայրահեղ բարձր զարկերակային ճնշում (մինչև 180–220),
որոնք բժշկական տեսանկյունից կարող են անմիջական վտանգ ներկայացնել զինվորական ծառայության ընթացքում։
Ծնողը՝ Գ. Հ., գրավոր դիմումով վիճարկել է բուժհանձնաժողովի որոշումը և պահանջել լիարժեք, մասնագիտական բժշկական հետազոտություն։
Սակայն տեղի է ունեցել հետևյալը․
Դիմումը չի քննվել,
Դիմումին չի տրվել գրավոր պատասխան,
Ոչ մի օրինական վարչական ակտ չի ներկայացվել,
և դրա փոխարեն զինկոմիսարիատը դիմել է ոստիկանություն՝ զինակոչիկին բերման ենթարկելու և հարկադիր զորակոչելու նպատակով։
Սա նշանակում է, որ
- առողջական վիճակը վիճարկված է,
- վարչական վարույթը փաստացի շրջանցվել է,
- և կիրառվել է ճնշում՝ օրենքի փոխարեն։
Ստեղծված իրավիճակում, տարբեր ճնշումների ազդեցության տակ, ծնողը այլևս չի ցանկանում շարունակել բողոքարկումը իրավապահ մարմիններում։ Բայց դա չի դարձնում կատարվածը օրինական։
Սա խիստ վտանգավոր նախադեպ է։
Երբ՝
դիմումը չի քննվում,
առողջությունը անտեսվում է,
և փոխարենը գործի է դրվում ուժային մեխանիզմ,
ապա խոսքը արդեն ոչ թե զորակոչի, այլ ԱՆՕՐԻՆԱԿԱՆ ԶՈՐԱԿՈՉԻ մասին է։
Այս հրապարակումը կոչ է՝
- չլռել,
- արձանագրել,
- և հանրային դարձնել այն դեպքերը, երբ օրենքը չի պաշտպանում քաղաքացուն, այլ շրջանցվում է նրա հաշվին։
- Զորակոչը չի կարող իրականացվել առողջության հաշվին։
- Ոստիկանությունը չի կարող փոխարինել բժշկական հանձնաժողովին։
- Ճնշումը չի կարող փոխարինել օրենքին»։