«Իմ պայքարը միայն ծառերի մասին չէ, այլ նաև մանկական լեյկոզների և ասթմայի»․ Քրիստինա Վարդանյան

«Ազգային առաջընթաց» խմբակցության անդամ Քրիստինա Վարդանյանի ֆեյսբուքյան գրառումը․ «2023-ից ի վեր, Երևանում ՀԱՏՎԵԼ ԵՆ ՀԱԶԱՐԱՎՈՐ ԾԱՌԵՐ, ինչը հրամցվել է, որպես «գիտահեն մոտեցում»։ Այն բարբարոսական մեթոդաբանությունը, երբ զանգվածաբար միամոմենտ հատվում են հազարավոր հասուն ծառեր և տասնամյակներով մերկացվում են փողոցները, չունի արդարացում, ինչի մասին հարյուրավոր անգամ ասել եմ ոչ միայն ես, այլ նաև բազմաթիվ միջազգային փորձագետներ Ֆրանսիայից, Մեծ Բրիտանիայից, Ռուսաստանից, կլիմայով մեզ մոտ Ղազախստանից, Ուզբեկստանից և այլն։ Մեզ լսող չկա…
Ասում ենք, բայց չեք անում…
Ո՞վ է մեղավոր և պատասխանատու Երևանում տասնամյակներ կիրառվող ծառերը ոչնչացնող խորը էտի համար։
Երկար տարիներ, ներկայիս «Կանաչապատում և …» ՀՈԱԿ-ի գլխավոր դենդրոլոգ՝ Արծվի Գրիգորյանը և տնօրենի խորհրդական՝ Ժիրայր Վարդանյանը խորհուրդ էին տալիս քաղաքային իշխանություններին կիրառել, իսկ քաղաքապետ Տիգրան Ավինյանի օրոք՝ ի պաշտոնե պատասխանատվություն են կրում, ծառերի խորը էտի համար։
Հետևանքն այն է, որ կորցրել և կորցնում ենք մեր ծառերը։ Տասնամյակներ շարունակ նույն մասնագետները խրախուսել և արդարացրել են խորը էտը, իսկ այսօր նույն մարդիկ ասում են, որ սխալ էտի պատճառով ծառերը պետք է հատվեն։ Ո՞ւր էիք, որ «ով ոնց ուզում, էտում էր», դադարեցնեիք, չէ՞ որ ձեր ձայնը լսելի էր և շատ ընդունելի «նախկինների» օրոք, և այսօր, ի տարբերություն մեր ձայնի։
Իմ պայքարը միայն ծառերի մասին չէ, այն մանկական լեյկոզների և ասթմայի մասին է ևս։ Նաև իմացեք, որ իմ պաշտոնավարման օրոք՝ 2020-2021թթ. ՀՈԱԿ-ում հրամանով
արգելվեց խորը էտը, սկսվեցին ծառերի զանգվածային բուժման, գույքագրման, վիճակի գնահատման աշխատանքները։ Այդ ամենը նախատեսել էի, ի սկզբանե, երբ քաղաքապետ Հայկ Մարությանի առաջարկով 2019թ. սկսեցինք ձևավորել «Կանաչապատում և շրջակա միջավայրի պահպանություն» ՀՈԱԿ-ը… Տնօրեն դարձավ հայտնի Եվրոֆուբոլի նախկին մենեջերը, ում ղեկավարման օրոք հարուցվեց քրեական գործ… Անձը, որպես տնօրենի ժ/պ պաշտոնավարեց 3,5 ամիս, ապրիլին հայտարարվեց մրցույթ, որին նա չմասնակցեց։ Վերադարձավ քաղաքապետարան Հայկ Մարությանին պաշտոնից հեռացնելուց հետո, «աննախադեպ» արդյունքը բոլորդ տեսնում եք։
Երբ քաղաքապետը Երևանի ավագանու դահլիճում չի կարողանում պատասխանել իրեն ուղղված հարցերին, նա սկսում է խոսել հարցնողի մասին, սա վաղուց հայտնի տեխնոլոգիա է, որը շատ թույլ տեխնոլոգիա է 9,3% ընտրելու իրավունք ունեցող երևանցիների քվեով քաղաքապետ «ընտրված» Տիգրան Ավինյանի դեպքում։