«Սա փաստ է այն պնդման, որ այս մարդիկ իրենց դուրս են դնում ՀՀ-ից»․ Սարգիս Խանդանյան

«Շատ տարակուսելի է, որ կրոնական ինստիտուտը, որի անունն է Հայաստանյայց Առաքելական Սուրբ եկեղեցի, իր գլխավոր ժողովներից մեկը կազմակերպում է ՀՀ-ից դուրս»,- ճեպազրույցի ժամանակ ասել է ՔՊ-ական պատգամավոր Սարգիս Խանդանյանը՝ մեկնաբանելով տեղեկությունը, որ Եպիսկոպոսաց ժողովը կազմակերպվելու է Հայաստանից դուրս։ «Սա է նաև փաստ և փաստարկ այն պնդման, որ այն մարդիկ, որոնք այս որոշումները կայացնում են, իրենց դուրս են դնում Հայաստանի Հանրապետությունից և, ըստ էության, իրենց նպատակը չէ նպաստել Հայաստանի անկախությանը, ինքնիշխանությանը, միջազգային հեղինակության բարձրացմանը»,- հավելել է ՔՊ-ական պատգամավորը։ Լրագրողի դիտարկմանը, որ Մայր Աթոռն այս որոշումը պարզաբանել է՝ որպես հետևանք իշխանության կողմից հոգևորականների և Վեհափառի նկատմամբ պարբերաբար ճնշումների, Սարգիս Խանդանյանը պատասխանել է․ «Իշխանությունը, Հայաստանի կառավարությունը որևէ ինստիտուտի նկատմամբ, առավել ևս՝ Հայաստանյայց Առաքելական Սուրբ եկեղեցու, որևէ բռնաճնշում, ճնշում, հակազդեցություն չի ձեռնարկել, ընդհակառակը՝ ձեռնարկվել է բարենորոգման բավականին պոզիտիվ նախաձեռնություն»։