«Երևանի քաղաքապետարա՛ն, Աջափնյակ վարչական շրջա՛ն, այս տեսքի հետ համերա՞շխ եք»․ Արշալույս Մղդեսյան

Լրագրող Արշալույս Մղդեսյանը ֆեյսբուքյան իր էջում տեսանյութ է հրապարակել՝ կից գրելով. «Ենթադրում եմ տենդերը շահած կազմակերպությունն իր հայտում գնման տեխնիկական բնութագրին համահունչ նշած կլինի, որ Երևանում, ավելի կոնկրետ՝ Աբելյան-Ֆուչիկ խաչմերկում, փորած ու քանի օր է չփակած «խրամատները» պետք է պատշաճ ձևով կահավորի, երթևեկության անվտանգության կանոններին խիստ համահունչ:
Բայց մի բան է գալչկան, մեկ այլ բան, դրա իրականացումը, ավելի ստույգ՝ չիրականացումը:
Իսկ իրականության մեջ ունենք այս ինքնաշեն արգելապատնեշը՝ ցեմենտի ու ավազի պարկեր, և, իհարկե, անփոխարինելի աղբամանը, որը հայաստանյան իրողություններում աղբը կուտակելուն զուգահեռ հազար այլ «գործառույթ» ունի: Մեկ դառնում է արգելապատնեշ, մեկ բողոքի ցույցերի ինվենտար և այսպես շարունակ:
Հարգելի Երևանի քաղաքապետարան, Աջափնյակ վարչական շրջան, դուք այս տեսքի հետ համերա՞շխ եք:
Եվ սա մառախուղով պայմանավորված վատ տեսանելիության պայմաններում, որը կրկնակի վտանգավոր է դարձնում երթևեկությունը»: