Պուտինը և Տոկաևը ստորագրել են ռազմավարական գործընկերության մասին հռչակագիր

Ռուսաստանի և Ղազախստանի նախագահներ Վլադիմիր Պուտինը և Կասիմ-Ժոմարտ Տոկաևն ստորագրել են իրենց երկրների հարաբերությունները համապարփակ ռազմավարական գործընկերության և դաշինքի մակարդակի բարձրացնելու մասին հռչակագիր։ Ստորագրման արարողությունը տեղի է ունեցել Կրեմլում առաջնորդների բանակցություններից անմիջապես հետո, հաղորդում է «Կոմերսանտը»։
Կասիմ-Ժոմարտ Տոկաևը հռչակագրի ստորագրումն անվանել է Մոսկվա կատարած իր այցի հիմնական նպատակներից մեկը։ Նա ասել է, որ փաստաթուղթը «կբացի երկկողմ հարաբերությունների նոր դարաշրջան, կհաստատի փոխադարձ վստահության աննախադեպ մակարդակը և բոլոր ոլորտներում ավելի սերտ աշխատանքի համատեղ պատրաստակամությունը»։

Ռուսաստանի նախագահի մամուլի քարտուղար Դմիտրի Պեսկովը նշել է, որ Ղազախստանը Ռուսաստանի ռազմավարական և «հատուկ գործընկեր» է։

Ղազախստանի նախագահ Կասիմ-Ժոմարտ Տոկաևը Մոսկվա է ժամանել նոյեմբերի 11-ին։ Այցի առաջին օրը նա մոտ երկու ժամ զրուցել է Ռուսաստանի նախագահ Վլադիմիր Պուտինի հետ ոչ պաշտոնական հանդիպման ժամանակ։

Այսօր առաջնորդները պաշտոնական բանակցություններ են վարել՝ քննարկելով «քաղաքական, առևտրային, տնտեսական, ներդրումային և հումանիտար համագործակցությանը վերաբերող հարցերի լայն շրջանակ»։ Վլադիմիր Պուտինը Ղազախստանի նախագահի հետ երկխոսությունը որակել է բովանդակալից և արդյունավետ։