ՀԱՀ-ում հորդառատ անձրևներն ու ձյունը տասնյակ մարդկանց մահվան պատճառ են դարձել

Հորդառատ անձրևներն ու ձյունը հարվածել են Հարավաֆրիկյան Հանրապետության (ՀԱՀ) մի քանի շրջանների: Արևելյան Քեյփ նահանգում ջրհեղեղներ են սկսվել: Ըստ «Ալ Ջազիրա»-ի՝ առնվազն 49 մարդ է զոհվել։

Նախորդ օրը ջրհեղեղը քշել էր դպրոցական ավտոբուս, որի մեջ երեխաներ են եղել, մամուլի ասուլիսում հայտարարել է Արևելյան Քեյփ նահանգի նահանգապետ Լուբաբալո Օսկար Մաբույանեն: Ավագ դպրոցի 6 աշակերտ զոհվել է, իսկ 4-ը՝ անհետ կորել: Երեք աշակերտ փրկվել է։

Մաբույանեն հավելել է, որ անձրևներն ու ձյունը սողանքների պատճառ են դարձել, ինչը հանգեցրել է բազմաթիվ մայրուղիների փակմանը: Եղանակային պայմանները նաև բազմակիլոմետրանոց խցանումներ են ստեղծել ճանապարհներին: Հանրապետության հարավում և արևելքում հարյուրհազարավոր տներ մնացել են առանց էլեկտրաէներգիայի: