«Զանգեզուրի նախագիծը ձախողվեց». Խամանեիի խորհրդական

Իրանի Գերագույն առաջնորդի քաղաքական հարցերով խորհրդական Ալի Աքբար Վելայաթին, խոսելով Հարավային Կովկասի մասին, անդրադարձել է նաև «Զանգեզուրի միջանցքի» թեմային։ «Իսլամից հետո Իրանը երբեք այսքան հզոր, անկախ և ազդեցիկ չի եղել։ Այս հզորության ցուցանիշներից մեկն Իրանի կտրուկ և վճռական արձագանքն էր Հարավային Կովկասի ճգնաժամին։ Այն ժամանակ, երբ որոշ երկրներ ցանկանում էին կապ հաստատել Ադրբեջանի և Նախիջևանի միջև Հայաստանի տարածքով՝ «Զանգեզուրի միջանցք» անվամբ, նախագիծ, որի իրական նպատակն էր մասնատել Հայաստանը և կտրել Իրանի կապը Եվրոպայի հետ, Իրանը մեծ զգոնությամբ և ուժով հանդես եկավ դրա դեմ և կանխեց այս դավադրությունը։

Ինչպես խոստովանել է ԱՄՆ նախագահ Ջո Բայդենը, ամեն ինչ պատրաստ էր այս միջանցքի շահագործման համար, բայց Իրանը թույլ չտվեց դա։ Սա ցույց է տալիս, որ անգամ առանց Ռուսաստանի, իր իմաստուն քաղաքականությամբ Իրանը կարողացավ պահպանել Կովկասի անվտանգությունը և կանխել ՆԱՏՕ-ի ներթափանցումը տարածաշրջան։

Իրանի ներկայությունը Հարավային Կովկասում ոչ միայն պաշտպանում է ազգային շահերը, այլև ծառայում է որպես ուժեղ պատնեշ տարածաշրջանում արտաքին ազդեցության ներթափանցման դեմ։ Իրանին հաջողվեց կանխել իր դեմ ուղղված ևս մեկ միջազգային դավադրություն։ Թշնամիների՝ «Զանգեզուր» նախագծի վերջնական նպատակն էր մեկուսացնել Իրանը հյուսիսից և շրջափակել Ռուսաստանը հարավից, սակայն այս նախագիծը նույնպես ձախողվեց»,- նշել է Վելայաթին։